VOV4.Xơ Đăng - Kơxê hâi lơ 16/9, a Tíu pêi cheăng kăn xiâm hnê ngăn tơnêi têa, pôa Nguyễn Xuân Phúc, Kăn xiâm hnê ngăn tơnêi têa pin hiăng tơdah mâu ngế hriăn cheăng ‘na khoa hok lâp plâi tơnêi ki veăng hôp dó inâi “Khoa hok, hiâm tuăn, ƀă mơnhông kuăn mơngế” po a kong pơlê Bình Định tung hneăng hôp “Trâm mâ Việt Nam” roh má 18. Teăng mâ tơnêi têa ƀă kuăn pơlê Việt Nam, pôa Nguyễn Xuân Phúc hiăng koh tơdah 51 ngế hriăn cheăng khoa hok lâp plâi tơnêi ki veăng hôp “Khoa hok, hiâm tuăn ƀă mơnhông kuăn mơngế”, ai mâu hnoăng cheăng khoa hok ki pleăng hnoăng cheăng ăm tơnêi têa ƀă lâp plâi tơnêi.

Kăn xiâm hnê ngăn tơnêi têa tơdah mâu kăn khoa hok lâp plâi tơnêi ‘na tơdroăng "Trâm mâ Việt Nam”

Tơdrêng amê, Kăn xiâm hnê ngăn tơnêi têa vêh mơnhên tơdroăng kơdo mơ-eăm tơrŭm ƀă pêi pro klêi hneăng Hôp dêi tơdroăng “Trâm mâ Việt Nam” ƀă Khu tơrŭm ngăn ‘na Kuô̆k hô̆i lâp plâi tơnêi, Khu xiâm ngăn ‘na Khoa hok ƀă kŏng ngê̆, kong pơlê Bình Định, Viê̆n hriăn plĕng mơnhông dêi kong têa Pơhlăng ki cheăng a Việt Nam.

Hneăng hôp cho môi tơdroăng ki kal kân khât ối tung hnoăng cheăng dêi Khu xiâm ngăn ‘na Khoa hok ƀă Kŏng ngê̆, veăng pêi pro Hơnăm Lâp plâi tơnêi Khoa hok ki xiâm xua vâ mơnhông krá tơniăn xua Khu lâp kong têa hiăng mơ’no tơbleăng a mơ’nui hơnăm 2021 ƀă UNESCO tối tơbleăng xiâm a khế 7 hơnăm 2022.

Nhat Lisa tơplôu ƀă tơbleăng