Kơxê hâi lơ 28/12, a tíu pêi cheăng Kăn xiâm hnê ngăn tơnêi têa, pôa Nguyễn Xuân Phúc, Kăn xiâm hnê ngăn tơnêi têa tơdah Kăn teăng mâ kong têa Sri Lanka, Kăn teăng mâ kong têa Kul koh pơ’lâng mơgêi hneăng cheăng. Tơdah kăn teăng ma Sri Lanka, pôa Nguyễn Xuân Phúc mơnhên tối, Việt Nam nhuô̆m tơrŭm cheăng tiô khôi vâi krâ nah ƀă tơrŭm tŭm túa ƀă kong têa Sri Lanka, pói vâ djâ tơrŭm cheăng péa tơnêi têa mơnhông mơdêk châ tơƀrê ƀă păng ‘nâng tâ mê nếo.

Tung la ngiâ, pôa Nguyễn Xuân Phúc pơkâ thế, péa tơnêi têa pơtối tơpui tơno ƀă mâu khu râ kăn xiâm ƀă mâu khu râ, tung mâu hnoăng cheăng dêi Chin phuh, Kuô̆k hô̆i, Đảng kal kí ƀă trâm mâ tơpui tơno kuăn pơlê. Tơdah Kăn teăng mâ kong têa Kul koh pơ’lâng, pôa Nguyễn Xuân Phúc rơkâu Kăn teăng mâ pêi kêi đeăng hnoăng cheăng, veăng kum hên ăm tơrŭm cheăng pơla péa tơnêi têa, ki má lối cho tung hơnăm Tơrŭm cheăng Việt Nam – Kul 2022.

Kăn xiâm hnê ngăn tơnêi têa pói vâ, la ngiâ, mơhé pôu râng hnoăng cheăng ki lâi Kăn teăng mâ xuân đi đo pâ ‘na tơnêi têa Việt Nam, pơtối veăng kum ivá tơná tung tơdroăng rak, pro krá tơniăn khôi túa rŭm môi tuăn, tơrŭm nhŏng o, tơrŭm cheăng ƀă kum dêi pó pơla péa tơnêi têa.