VOV4.Xơ Đăng - Kơxê lơ 30/8, a Tíu pêi cheăng Kăn xiâm hnê ngăn tơnêi têa, pôa Nguyễn Xuân Phúc, Kăn xiâm hnê ngăn tơnêi têa hiăng tơdah mâu khu râ kăn lâp plâi tơnêi veăng Hneăng hôp Khu lo tŏng veăng tơnêi têa Việt Nam, xua pôa Jagannath Chapagain, Kăn xiâm chêh tôm xo rơkong Khu lâp kong têa – Trăng lưỡi liềm đỏ lâp plâi tơnêi pơkuâ djâ. Pôa Nguyễn Xuân Phúc phiu ro pôa Jagannath Chapagain ƀă mâu kăn teăng mâ lâp plâi tơnêi veăng Hneăng hôp má XI Khu lo tŏng veăng Việt Nam.

Kăn xiâm hnê ngăn tơnêi têa kheăn kơdeăn Khu tơrŭm cheăng, Vi ƀan Khu lo tŏng veăng lâp plâi tơnêi ƀă khu tơrŭm lâp plâi tơnêi, hiăng kum hên, châ tơƀrê ƀă Khu lo tŏng veăng Việt Nam ƀă kuăn pơlê Việt Nam, ki má lối ƀă mâu ngế tơ’lêi tơdjâk, mâu ngế rong râ xua tơplâ xâ, mâu ngế trâm xía vâ xua kong prâi pro, pơreăng xông tâ tú pơla kố nah.

Pôa Nguyễn Xuân Phúc, Kăn xiâm hnê ngăn tơnêi têa trâm mâ mâu kăn teăng mâ lâp plâi tơnêi veăng Hneăng hôp Khu lâp kong têa Việt Nam

Pôa Nguyễn Xuân Phúc, Kăn xiâm hnê ngăn tơnêi têa tối ăm ‘nâi, Việt Nam tro tơdjâk râ ó xua kong prâi hơ’lêh, xua mê pói vâ Khu tơrŭm ƀă mâu khu cheăng lâp plâi tơnêi tŏng kum ôh tá mơdrếo mâu tơdroăng pêi, tơdroăng tơkêa bro tung kơvâ kố, vâ kum kuăn pơlê kơdroh châi, tơdrêng amê pêi pro pơkâ rak vế kong prâi, kơdroh mơ’no xok chhá tung kong prâi ƀă hía hé.

A Sa Ly tơplôu ƀă tơbleăng