VOV4.Xơ Đăng - Tung pơla dế ối a Nhuk veăng a Leh ‘mế pôa Shinzo Abe, Ngế pro xiâm hnê ngăn kong têa Nhuk hneăng hdrối ki nếo hlâ, hâi lơ 27/9, pôa Nguyễn Xuân Phúc, kăn xiâm hnê ngăn tơnêi têa hiăng ai mâu rôh trâm mâ pơla péa pâ ƀă kăn pơkuâ xiâm mâu kong têa ƀă mâu khu tơrŭm cheăng ki veăng a leh ‘mế.

A rôh trâm pôa Samdech Techo Hun Sen, Ngế pro xiâm hnê ngăn kong têa Kul, péa pâ tối nhên tơdroăng ki ngăn nhuô̆m ƀă kơjo kum ăm tơdroăng ki rơtế ƀă dêi pó rak vế ƀă ôh tá la lâi pơtê ‘mâi mơnhông tơrŭm cheăng achê rak tơniăn lĕm, tơrŭm tơroâ khôi hmâ, tơrŭm tung tâi tâng, krá tơniăn ton pơla péa tơnêi têa.

Pôa Shinzo Abe, Ngế pro xiâm hnê ngăn kong têa Nhuk hneăng hdrối ki hiăng hlâ

A rôh tơpui tơno ƀă kăn hnê ngăn Hô̆i đong Châu Âu pôa Charles Michel, Kăn xiâm hnê ngăn tơnêi têa pin mơnhên tối khât tơdroăng ki Kong têa tơrŭm cheăng tung tâi tâng pơla Việt Nam – EU, tối nhên Việt Nam ngăn nhuô̆m EU cho khu tơrŭm cheăng ki kal xiâm dêi Việt Nam; phiu ro EU mơ’no hên tơdroăng ki tơchĕng tơmiât rơkê mơdêk tơrŭm ƀă kơpong Châu Á - Thái Bình Dương.

VOV/Tơplôu: Katarina Nga