VOV4.Xơ Đăng - Kơxo lơ 23/9, a Pơlê kong kân Đà Nẵng, Khu pơkuâ hnê ngăn cheăng Đảng Pơlê kong kân Đà Nẵng tơrŭm ƀă Kơ koan xiâm pơkuâ tơdroăng ƀlêi trâng mơnhông mơdêk Khu lêng, Khu xiâm pơkuâ Kuân khu 5 tơkŭm po Hneăng hôp tơpui tơno khoa hok ƀă dó inâi: ‘’70 hơnăm ƀlêi trâng Đồn Nhất – Hải Vân Quan – Tơdroăng tơbâ ƀlêi trâng mơnhông mơdêk, túa ki rơkê ‘na mơjiâng troăng tơplâ xâ dêi kuăn pơlê’’. Tung tơdroăng ƀlêi trâng mơnhông mơdêk tơnêi têa, Ƀlêi trâng Đồn Nhất – Hải Vân Quan lôi ăm hên túa ki rơkê tơtro ƀă ƀai hriâm ki kơnía ăm khu lêng Liên khu 5 tung plâ roh tơplâ xâ Pơhlăng ƀă Mih mot tơbriât tơnêi tơníu tơnêi têa pin.

Pôa Nguyễn Xuân Phúc, Kăn xiâm hnê ngăn tơnêi têa xup um tơbâ rơtế mâu mô đô̆i hneăng hdrối nah a Hneăng hôp tơpui tơno

Ƀlêi trâng kố cho um méa ăm ngê̆ thuât plâ xâ đông dêi khu lêng ƀă kuăn pơlê Kuân khu 5, po troăng tơplâ nếo tung ngo ngối kong kế, tíu ối hmuâ dêi lêng kong têa ê krá tơniăn ƀă răng on rơdêi; ƀlêi trâng Đồn Nhất hiăng mơnhên tơdroăng tơrŭm ƀeăn ƀĕng pơla tơdroăng cheăng lêng ƀă tơdroăng kal kí, pơla tơplâ dêi mô đô̆i ƀă tơrŭm ivá ó rơdêi dêi kuăn pơlê ƀă mơjiâng khu tơplâ yu kĭt pơlê kong kân.

Hneăng hôp tơpui tơno cho roh vâ hvái ngăn mâu ƀai hriâm ki kơnâ tung péa roh tơplâ xâ dêi hdroâng mơngế, pơtroh tơ’nôm mâu tơdroăng mơnhên khoa hok, mơnhên tâ hnoăng dêi ngê̆ thuât tơplâ xâ kuăn pơlê tung tơdroăng gâk kring Tơnêi têa.

A Sa Ly tơplôu ƀă tơbleăng