Klêi kơ’nâi 2 hơnăm mơnúa pro, hâi lơ 16/6, Rơ’jíu Hrik mơ’no hyôh kơpong Nam Trung bộ, ối a tơring Thuận Nam, kong pơlê Ninh Thuận hiăng pơxiâm mơ’no hyôh, djâ rơkong tơpui tối Việt Nam troh a kơpong hơngế hơngo dêi kuăn pơlê, mâu lêng kơpong Nam Trung bộ ƀă chuăn Trường Sa. Pôa Võ Văn Thưởng, Kăn xiâm hnê ngăn tơnêi têa veăng leh mơjiâng pro klêi Rơ’jíu hrik ‘no hyôh tơpui.

A chôu phut leh mê, pôa Vũ Hải Quang, Kăn xiâm phŏ ngăn Rơ’jíu Việt Nam tối ăm ‘nâi, Rơ’jíu hrik ‘no hyôh tơpui Nam Trung bộ cho tíu ki kal khât tung tơdroăng hrik ‘no dêi Rơ’jíu ki kal xiâm tơnêi têa, ing mê, veăng kum ăm Rơ’jíu  xiâm Việt Nam pêi pro lĕm tro ó tâ nếo hnoăng cheăng kal kí xua Đảng ƀă Tơnêi têa pơcháu.

Xông tơpui a Leh mơjiâng pro klêi mê, teăng mâ kăn xiâm pơkuâ hnê ngăn Đảng, Tơnêi têa, pôa Võ Văn Thưởng, Kăn xiâm hnê ngăn tơnêi têa rơkâu tâi tâng mâu kăn pơkuâ, mâu kăn ƀô̆, mơngế cheăng dêi Rơ’jíu xiâm Việt Nam hiăng hâk phiu hâi ki mơjiâng pro Rơ’jíu hrik ‘no hyôh tơpui Nam Trung bộ tro klăng koh tơbâ 98 hơnăm hâi Hlá tơbeăng Kăch măng Việt Nam, hnối tối nhên, tơdroăng kố ga ai pơxúa kân kal khât, djâ Rơ’jíu xiâm Việt Nam châ mơ’no hyôh tung lâp lu chuăn peăng pá hâi lo pá hdroh tơnêi têa, mâu kơpong hơngế hơngo, kơpong xahpá dêi mâu kong pơlê Nam Trung bộ, ing mê, veăng kum pro rơkong tơpui tối dêi Đảng, tơnêi têa troh ƀă kuăn pơlê, pơtroh mâu tơdroăng cheăng ki kal ‘na pêi cheăng kâ, rêh ối pơlê pơla, ki rơhêng vâ tối ‘na tơdroăng têa kân lân lu troh ƀă kuăn pơlê ki tơnăng ká xing xŏng, mâu tơdroăng ki nếo ‘na tơrŭm tơpui kâ pơla Việt Nam ƀă mâu kong têa ki ê.