VOV4.Xơ Đăng - Kơxo lơ 28/8, a pơlê kong kơdrâm Sầm Sơn, kong pơlê Thanh Hóa, pôa Nguyễn Xuân Phúc, Kăn xiâm hnê ngăn tơnêi têa veăng leh mơjiâng pro kơpong Tíu tơbâ kuăn ngo, kăn ƀô̆, mâu lêng ƀă hok tro peăng Hdroh lăm hriâm peăng Kơnhŏng; Leh tơbleăng Pơkâ dêi Ngế pro xiâm hnê ngăn Chin phuh mơnhên pơlê kong kơdrâm Sầm Sơn hiăng pê klêi tơdroăng mơjiâng thôn pơlê nếo leh tơdah Mê dai pêi cheăng ối má pái dêi Kăn xiâm hnê ngăn tơnei têa.

Tiô tối tơbleăng a rôh leh, ing tơdế khế 10 hơnăm 1954 troh khế 5 hơnăm 1955, a cheăm Quản Tiến, nôkố cho bêng Quảng Tiến pơlê kong kơdrâm Sầm Sơn, kong pơlê Thanh Hóa châ pơcháu tơdah lối 47 rơpâu 300 ngế kăn ƀô̆, vâ chê 7 rơpâu 500 hok tro, sinh viên ƀă rơpŏng hngêi kăn ƀô̆ hneăng hdrối a Peăng hdroh ki lăm hriâm a kơnhŏng nah.

Pôa Nguyễn Xuân Phúc, Kăn xiâm hnê ngăn tơnêi têa pêi pro tơdroăng pơxiâm pêi a kơpong tơbâ kuăn ngo, kăn ƀô̆, mâu lêng ƀă hok tro peăng Hdroh lăm a peăng Kơnhŏng

Nôkố tiô púi vâ dêi mâu kăn ƀô̆ mâu lêng hok tro ki lăm hriâm hneăng hdrối nah, kong pơlê Thanh Hóa púi vâ ăm pơlê kong kơdrâm Sầm Sơn mơhno tơnêi ki vâ mơjiâng tơdroăng tơkêa bro tơbâ kơpong Kuăn ngo, kăn ƀô̆ mâu lêng ƀă hok tro ki lăm hriâm a peăng Kơnhŏng nah. Tơbleăng a rôh leh, pôa Nguyễn Xuân Phúc, Kăn xiâm hnê ngăn tơnêi têa khĕn kơdeăn kong pơlê Thanh Hóa, pơlê kong kơdrâm Sầm Sơn hiăng hbrâ tro má môi ăm tơdroăng pơxiâm mơjiâng pro kơpong tíu tơbâ ton nah dêi kuăn ngo, kăn ƀô̆, mâu lêng ƀă mâu hok tro peăng Hdroh tơnêi têa ki lăm hriâm a peăng Kơnhŏng, hlối pơkâ thế pêi pro tro tơdroăng ‘mâi rơnêu xúa teăm drêng troh leh tơbâ 70 hơnăm kuăn pơlê, kăn ƀô̆, mâu lêng, hok tro peăng Hdroh tơnêi têa lăm hriâm peăng Kơnhŏng.

Gương tơplôu bă tơbleăng