Hâi lơ 26/4, pôa Võ Văn Thưởng, Kăn xiâm hnê ngăn tơnêi têa hiăng veăng leh  ƀă tối tơbleăng a Leh tơbâ 60 hơnăm Hâi mơjiâng Khu tơrŭm Tê mơdró ƀă cheăng kơmăi kơmok Việt Nam. Kăn xiâm hnê ngăn tơnêi têa khĕn kơdeăn  Khu tơrŭm cheăng Tê mơdró ƀă cheăng kơmăi kơmok Việt Nam hiăng pêi klêi tơdroăng cheăng ki Đảng, Tơnêi têa pơcháu tung 60 hơnăm hdrối, mơdêk khu mơdró, ngế mơdró rơkê dêi Việt Nam rế rơdêi.

Kơ’nâi vâ chê 40 hơnăm pơ’lêh nếo, mâu mơngế ki mơdró rơkê, khu mơdró dêi tơnêi têa pin hiăng rơdêi tơkâ luâ vâ chê 1 rơtuh khu mơdró, tung lối 5 rơtuh khu mơdró krê dêi mâu ngế, vâ chê 30 rơpâu Khu pêi cheăng tơrŭm. Tơdrêng amê, vâ chê 30 rơpâu khu mơdró ai liăn ‘no cheăng ing kong têa ê dế ‘no pêi cheăng a Việt Nam, veăng ‘no hnoăng kal tung mơnhông ivá pêi lo tơmeăm tê ăm kong têa ê, pơ’lêh cheăng kâ ƀă ki tâk ‘na cheăng kâ Việt Nam.

Kăn xiâm hnê ngăn tơnêi têa tối, Đảng, Tơnêi têa đi đo tơmâng veăng kum, pro tơ’lêi hlâu ăm tơdroăng mơnhông mơdêk, pêi pro rơdêi mâu khu mơdró krê, khu mơdró Việt Nam.

A rôh leh, Khu tơrŭm cheăng Tê mơdró ƀă Kơmăi kơmok Việt Nam tơbleăng Hô̆i đong Khu mơdró má môi Việt Nam ai 21 ngế ki apoăng cho teăng mâ mâu khu mơdró ki xiâm kơvâ cheăng Việt Nam.