Kơxo hâi lơ 25/4, ngế xiam cheăng tung Khu kal kí, Kăn xiâm phŏ hnê ngăn Kuô̆k hô̆i pôa Trần Thanh Mẫn rơtế ƀă mâu kăn Kuô̆k hô̆i kong pơlê Hậu Giang hiăng ai rôh trâm kuăn pơlê a tơring Châu Thành A, kong pơlê Hâụ Giang. A rôh trâm kuăn pơlê, mâu kăn Kuô̆k hô̆i kong pơlê Hậu Giang hiăng tối tơbleăng tơdroăng vâ pêi dêi rôh hôp má Pơtăm, Kuô̆k hô̆i hneăng 15; tơdroăng tiâ rơkong kơ-êng, pâ thế dêi kuăn pơlê. Klêi mê, hên kuăn pơlê xông tơpui tối mâu tơdroăng tơmiât, púi vâ mâu tơdroăng kuăn pơlê ối tô tuăn a kong pơlê tối ăm mâu kăn Kuô̆k hô̆i. 

Xông tơpui a rôh trâm mâ, Kăn xiâm phŏ hnê ngăn Kuô̆k hô̆i - pôa Trần Thanh Mẫn pơkâ thế Hâụ Giang mơ-eăm tơbleăng pêi tơdroăng pơkâ Hneăng Hôp kân má 13 dêi Đảng, Pơkâ hneăng Hôp kân Đảng ƀô̆ kong pơlê Hâụ Giang rôh má 14; kal thế tơmâng hnê mơjiâng mơngế vâ pêi cheăng vâ mơnhông dêi kong pơlê; mơjiâng khu kăn cheăng kal kí tuăn lĕm, tơdrăng, rơdêi ai tiô púi vâ tung tơdroăng rêh ối cheăng kâ nôkố.