Kố cho rôh hôp apoăng klêi kơ’nâi Khu Hnê mơhno châ mơjiâng, mơhno hiâm mơno pêi pro thâ, kơtăng, rơkê, pêi tơdrêng hlối mâu hnoăng cheăng ki kân dêi Đảng pin tung hneăng nếo. Mơgêi rôh pêi cheăng, pôa Tô Lâm, Kăn xiâm pơkuâ hnê ngăn Đảng tối nhên túa tơmiât, pin dế hbrâ rơnáu ăm môi hneăng ki tơviah mê cho tơbâ 100 hơnăm tơnêi têa xua tơdroăng pơkuâ dêi Đảng Kŏng san Việt Nam ƀă 40 hơnăm pêi pro Cương lĩnh mơjiâng tơnêi têa tung chal ki tâk troh chuh ngiah xah hô̆i.

Mơgêi 100 hơnăm cho rôh vâ pin hvái ngăn tâi tâng hneăng ki Đảng pơkuâ hdroâng mơngế: sap ing tơplâ châ tơniăn krê, pro tơnêi têa tơrŭm chiâng môi, troh mơjiâng ƀă rak vế Tơnêi têa xah hô̆i chuh ngiah; ing troăng hơlâ túa pơkâ pêi tơkŭm troh rôh Pơhlêh nếo tŭm têk; sap ing môi tơnêi têa kơtiê, chiâng môi tơnêi têa ai tíu ối rế hía rế kân tung mâu kong têa lâp plâi tơnêi.

Kố cho rôh tơ’lêi vâ pêi pro nhên tâ túa pơkâ mơnhông, mâu tơdroăng pêi tơƀrê, mâu tơdroăng pêi ối ‘ro, ôh tá tơniăn, xiâm kối ƀă ƀai hriâm ki rơkê plĕng. Ki kal tâ cho hbrâ rơnáu mâu troăng tơpui kâ tung tơdroăng cheăng ki ai khât ăm mâu pơkâ pêi tung la ngiâ tung hneăng mơnhông nếo, tơmiât troh hơnăm 2045 ƀă hơngế tâ nếo cho troăng tơmiât pơkuâ mơnhông tơnêi têa troh hơnăm 2130 .