Kăn xiâm pơkuâ hnê ngăn cheăng Đảng khê̆n kơdeăn ivá mơeăm dêi mâu kăn ƀô̆, ngế chêh hlá tơbeăng Nhân dân drêng mơnhên: Tíu lâi ai Kuăn pơlê, tíu mê ai Hlá tơbeăng Nhân dân, pơkâ mơ’no tơdroăng cheăng athế pêi cho hlá tơbeăng rế hía rế hmâ achê, ro ƀă ai pơxúa.

Kăn xiâm pơkuâ hnê ngăn cheăng Đảng tối nhên, hlá tơbeăng kăch măng tối tơdjuôm, Hlá tơbeăng Nhân dân tối krê, athế pêi pro, pêi rơdêi, pêi tơdrăng, pêi trâu hngế, ai pơxúa pêi tŭm têk. Hlá tơbeăng athế cho hlá tơbeăng dêi hiâm mơno kuăn pơlê, inâi tơpui dêi kuăn pơlê, pơkuâ djâ pơlê pơla, ‘mâi mơnhông tơdroăng loi, mơnhông tơdroăng púi rơhêng vâ, pro chiâng tơdroăng ki môi tuăn tung tâi tâng pơlê pơla, Kăn xiâm pơkuâ hnê ngăn cheăng Đảng tối 9 tơdroăng vâ tâi tâng kăn pơkuâ, kăn ƀô̆ pơkuâ dêi Hlá tơbeăng Nhân dân athế tơkŭm pêi pro tung la ngiâ.

Hlá tơbeăng kal pơtối pơhlêh nếo rơdêi túa ki hnê tối ing hên ƀâng, nhên tơdroăng pơkâ pêi, ai hiâm mơno khên tơnôu, rak vế luât, pêi pro kơtăng ‘na tơdroăng cheăng, mơeăm pêi châ tiô tơdroăng púi rơhêng vâ tơdroăng cheăng pơkâ thế, veăng rơtế ƀă tâi tâng Đảng, tâi tâng kuăn pơlê ƀă tâi tâng lêng pin pêi pro ƀlêi chiâng Pơkâ Hneăng hôp rôh má XIV dêi Đảng xua ki xiâm cho mơjiâng môi tơnêi têa Việt Nam hơniâp lĕm, tơniăn krê, kro mơdrŏng, rơkê plĕng, hơniâp lĕm, krá rơdêi tâk troh chuh nghiah xah hô̆i.