Kơxê lơ 19/6, pôa Nguyễn Trọng Nghĩa, Kăn pơkuâ hnê ngăn cheăng Đảng tơnêi têa, Kăn xiâm pơkuâ pơtâng tối tơdroăng kal tơnêi têa pơkuâ djâ khu râ kăn pêi cheăng Khu xiâm pơtâng tối tơdroăng kal tơnêi têa troh lăm pôu rơkâu khu pú hên khu râ kăn pơkuâ kăn ƀô̆, ngế chêh hlá tơbeăng, ngế rah chêh hlá tơbeăng, ngế chêh hlá tơbeăng, viên chưk, mơngế pêi cheăng dêi Rơ’jíu Việt Nam (VOV) klăng roh leh tơbâ 98 hơnăm hâi Hlá tơbeăng Kăch măng Việt Nam (21/6).

Kheăn kơdeăn VOV cho môi tung mâu kơ koan chêh hlá tơbeăng ki xiâm đi đo hơ’lêh nếo ó rơdêi vâ thăm pêi pro rơdêi tơdroăng pơtâng tối, vâ hyôh dêi VOV troh hơngế ôh tá xê a rŏng tơnêi, rơlố têa kơxĭ, ƀă kuăn pơlê a tơkăng kong, kơpong hơngế hơngo ƀă ki rơhêng vâ tối mơngế Việt Nam a kong têa ê.

Pôa Nguyễn Trọng Nghĩa pơchân tối: Tơdroăng ki klâi hiăng chiâng pêi mê pin thế rak ƀă thế pêi lĕm tro tâ. Hyôh VOV mơ’no a Trường Sa ƀă kơpong Tây Nguyên cho têi lĕm. Xua kố ôh tá xê to mơ’no tơdroăng hơdruê vâ pơro mê ối tơbleăng tơdroăng ki kal mê cho hnoăng gak kring Tơnêi têa, mơnhên hnoăng pơkuâ dêi pin, tŏng xo mơngế hliăng tiâ ƀă mâu tơdroăng ki ê nếo... xuân pói tâi tâng pin rak troăng prôk krá tơniăn môi tiah mê.