Tơdroăng tơplâ tơplong a Trung Đông kô pro yă têa châu têa kơxăng ƀă kơxô̆ liăn ki tơrŭm cheăng logistics pơtối tâk, ing mê, toi kơxô̆ liăn hrik chuâ, pơto dêi khu tê mơdró tâk. Tơ’lêi tot tơdế rá mâu tơdroăng pơto têa châu têa kơxăng drô troăng têa kơxĭ lâp plâi tơnêi, klêi mê, xuân kô tơdjâk troh tơdroăng tê rôe têa châu ngi kong têa ê, tơdjâk kân troh mâu kơvâ cheăng kâ ki xiâm dêi Khánh Hòa môi tiah pro plong tuk, tơnăng ká xi xŏng, pơto tơmeăm khoăng drô troăng têa kơxĭ ƀă tơ’mot tơmối mot ôm hyô – tê mơdró kâ.

Drêng ai tơdroăng ki ôh tá tơniăn dêi kơchơ mơdró lâp plâi tơnêi, hên khu tê mơdró tung kong pơlê dế hbrâ pêi pro hnoăng tơná vâ khoh châ kâi trâng, ai hên kơchơ mơdró ƀă mơdêk ki kơnâ dêi tơmeăm khoăng. Jâ Trịnh Thị Hồng Vân, Kăn pơkuâ hnê ngăn cheăng Đảng ủi, Kăn hnê ngăn Hô̆i đong hnê mơhno Kŏng ti pêi cheăng tiô rơnó môi khu cheăng kâ inâi Yến Sào Khánh Hòa tối ăm ngin ‘nâi ‘na khu tê mơdró dế mơdêk kơdroh kơxô̆ liăn ki mơhá ngế ki tung dế, po rơdâ tê mơdró tung tơnêi têa ƀă mâu kong têa ki ê.

“Pakĭng tơrŭm tê mơ’no ngi kong têa ê kơpâu chêm yến, ngin kô mơdêk mơjiâng mâu tơmeăm klêi kơ’nâi bro, ing mê mơdêk ki kơnâ tơtêk ăm kong pơlê, ăm khu tê mơdró. Ngin kô tơrŭm ƀă mâu grup pơkuâ kân peăng kong têa Sinuâ vâ mơnhông tê mơdró kâ’’.

Tiô pôa Nguyễn Sanh Đương, Phŏ kăn pơkuâ Khu ngăn Kơmăi kơmok - Tê mơdró Khánh Hòa tối ăm ngin ‘nâi, tơdroăng ôh tá tơniăn a Trung Đông dế tơdjâk kân troh tơdroăng mơjiâng pro, tê mơdró dêi hên khu tê mơdró tung kong pơlê. Nôkố pêi lo liăn tê ngi kong têa ê dêi Khánh Hòa troh kơpong kố châ dâng 210 rơtuh dollars, vâ chê 10% tâi tâng kơxô̆ liăn tê tơmeăm ngi kong têa ê, drêng rôe ing kong têa ê dâng 10 rơtuh dollars. Yă têa châu têa kơxăng tâk pro mâu kơvâ cheăng ki pro tuk, pro ká xi xŏng, ôm hyô – tê mơdró kâ chiu tơdjâk pá kân xua kơxô̆ mơjiâng pro ƀă pơto tơmeăm tâk hên.

Drêng ai tơdroăng kố, kơvâ kơmăi kơmok tê mơdró dế tơrŭm Khu pơkuâ Kơpong cheăng kâ ƀă Kơpong hngêi kơmăi kơmok kong pơlê Khánh Hòa tŏng gum khu tê mơdró tah lôi pá puât, mơdêk mâu tơdroăng tơkêa bro têa châu têa kơxăng ƀă kơmăi kơmok vâ tơ’nôm ivá kâi trâng ƀă tơtêk. Pôa Nguyễn Sanh Đương tối ăm ‘nâi:

“Vâ tơbêng, kơvâ tơkŭm tŏng gum khu mơ’no liăn cheăng. Ki rơhêng vâ tối ƀă 2 tơdroăng tơkêa bro on tơhrik kơtâu ƀă mâ hâi Phước Thái 2, Phước Thái 3, mơ-eăm pêi pro tung khế 3, mơhnhôk ki kơnâ on tơhrik ki mơdró. Tơdrêng amê, tơrŭm mâu khu, kơvâ cheăng, tŏng gum mâu khu mơ’no liăn cheăng kơmăi kơmok, tơveăng gum mâu tơdroăng pá puât, mơdêk hnoăng mơjiâng pro’’.

Mâu tơdroăng ki ôh tá tơniăn dêi cheăng kâ lâp plâi tơnêi ăm hlo ki kal dêi tơdroăng mơnhông tơnăng ká, xi xŏng, cheăng tê mơdró kâ kơxĭ ƀă khu tơdjâk cheăng tơrŭm logistics rơxông nếo. Ƀă ki pơxúa kơno têa kơxĭ, ki rơhêng vâ tối a Vân Phong, Khánh Hòa dế chôa ‘lâng mơnhên hnoăng tíu xiâm pơto tơmeăm tiô troăng têa kơxĭ ƀă logistics dêi kơpong Nam Trung Bộ.

Drêng tíu ki mơjiâng pro lâp plâi tơnêi vêh pro lế lĕm, tơdroăng mơ’no liăn cheăng tơdâng tơ’mô tơmeăm khoăng a kơno têa kơxĭ, kơpong kơmăi kơmok ƀă tê mơdró logistics kô gum kong pơlê mơdêk ivá kâi trâng hdrối mâu tơdroăng ki ôh tá tơniăn pakong. Pôa Nguyễn Thanh Hà, Phŏ Kăn hnê ngăn Vi ƀan kuăn pơlê kong pơlê Khánh Hòa tối ăm ‘nâi, vâ rak pơkâ tơtêk péa kơxô̆, kong pơlê dế séa ngăn tơdroăng mơ’no, tah lôi pá puât ăm khu tê mơdró ƀă mơdêk rĕng mâu tơdroăng tơkêa bro ki kal.

‘’Ivá ki xiâm tơtêk hơnăm 2026 xuân cho mơ’no liăn cheăng tơnêi têa. Ngin thế séa ngăn, xing xoăng kơxô̆ liăn, mơ’no liăn cheăng tơnêi têa sap apoăng. Kố cho tơdroăng cheăng ki kal, pơkâ ăm pơkâ tơtêk 2 kơxô̆ dêi Khánh Hòa tung hơnăm kố. Nôkố u ối lối 4.000 rơtal liăn kal kêi đeăng tơdroăng pêi inhên’’.

Tung 2 khế apoăng hơnăm 2026, kong pơlê Khánh Hòa xuân rak tơtêk hôm. Châ xo liăn ngân tơnêi têa châ lối 11.600 rơtal liăn, ƀă dâng 30% tiô riân ngăn hdrối Tơnêi têa pơcháu ƀă tâk 1,7 xôh tâng pơchông ƀă roh kố hơnăm nah. Tung pơla cheăng kâ lâp plâi tơnêi ối hên tơdroăng ki ôh tá tơniăn, tơdroăng hbrâ pơkuâ, hên hĭn tơmeăm kơchơ mơdró ƀă mơnhông ki tơ’lêi hlâu cheăng kâ tê kơxĭ cho troăng pêi vâ Khánh Hòa kô rak krá hnoăng mơnhông mơdêk, mơjiâng chiâng xiâm kối pêi pro pơkâ tơtêk krá tơniăn tung hơnăm 2026 ƀă mâu hơnăm pơtối.