Ta Hngêi trung râ má môi Nha Trang, 13 toăng hngêi trung châ tơkŭm chiâng môi to hngêi trung, ai 1 to hngêi trung xiâm, 12 toăng hngêi trung kŭn ƀă 5 tíu hngêi trung ki ê, ƀă lối 10.500 ngế hok tro. Mâu hngêi trung pro a tơnêi troh mâu hngêi trung xiâm a mâu chuăn tung kơpong Nha Trang.

Ƀă tơdroăng pơkâ mê, hngêi trung hiăng séa ngăn mâu thái cô tung tâi tâng hngêi trung, pơ’lêh mâu thái cô lăm hnê ing tíu ki ai tŭm thái cô troh tíu ki ôh tá ai, malối cho mâu môn ki phá tơ-ê. Jâ Châu Đình Mai Phương, Ngế pơkuâ Hngêi trung râ má môi Nha Trang, ăm 'nâi, tơdroăng xing xoăng, pơ’lêh tơtro rôh apoăng veăng kum tơdroăng hnê ƀă hriâm a hngêi trung.

"Pơtih hriâm kơvâ nâl Ănglê, hdrối nah a mâu tíu hriâm a mâu phân hiệu ai mâu hok tro athế nâp liăn vâ hriâm. La klêi kơ'nâi xing xoăng, thái cô ki hên a tíu kố kô châ pơtroh troh tíu ki ối kal thái cô, vâ hok tro châ hriâm la ôh tá nâp tơ'nôm liăn. Ƀă môn Tin hok xuân tiah mê. Klêi kơ'nâi xing xoăng, thái cô Tin hok châ tơdâng tơ'mô, xing xoăng 'na mâu tíu hriâm”.

Tơdroăng pơkuâ hngêi trung kân rơdâ, ƀă hên hngêi trung kŭn xuân pơkâ thế kơvâ hnê hriâm kong pơlê Khánh Hoà pơ'lêh troăng pơkuâ. Ngế pơkuâ hngêi trung tơmâng a mâu tơdroăng tơdjuôm 'na tơdroăng cheăng, khu hnê hriâm ƀă tơdroăng hriâm; mâu tơdroăng cheăng ối tung hngêi trung, tíu hnê hriâm châ pơcháu ăm ngế pơkuâ tơleăng a tíu mê. Hngêi trung kơdroh mâu roh hôp tơdrêng ki ôh tá kal, mơdêk tơpui tơno mơ'no tơdrêng ƀă xúa tơdroăng chêh 'măn tơdjuôm.

A râ cheăm, bêng, khu kăn pơkuâ tơrŭm rak tơniăn mâu tơdroăng tŏng gum hnê ƀă hriâm, malối cho tơmeăm khoăng, hngêi trung lâm hriâm ƀă tơleăng mâu tơdroăng ki nếo  trâm  ai a  hngêi trung.

Pôa Vũ Ngọc Đương, Ngế pơkuâ Khu pơkuâ ngăn hnê hriâm ƀă hnê mơjiâng tuăn ngôa rơkê kong pơlê Khánh Hòa tối ăm 'nâi, kơvâ kô pơtối séa ngăn khu, xing xoăng thái cô a mâu tíu ki hên, lăm hnê a tíu ki iâ, tơdrêng amê pê klêi luât pơkâ xing xoăng, xoăng râ.

 “Tơdroăng pơkuâ ngăn tiô kŏng ngê̆ thŏng tin, tiô kơxô̆, tiô pơkâ, tơdroăng pơkâ 'na xing xoăng, xoăng râ. Drêng 'mot tơdjuôm, tơdroăng ki pơxúa dêi mâu hngêi trung xiâm, mâu phân hiệu cho hngêi trung kŭn thế môi tiah dêi rơpó tung môi pơlê cheăm. Kố cho túa pêi pro ki tơ tro tơƀrê khât. Nôu pâ hok tro xuân môi tuăn. Teăng hdrối nah athế rah xo hngêi trung, rah xo mâu hngêi trung ki lĕm hnê rơkê, mê nôkố tung pơlê cheăm, tơdroăng hnê hriâm ƀă tơmeăm khoăng châ ăm tơniăn tơdâng tơ'mô tâ”.