Pơkâ pêi thăm mơnhông cheăng kâ tâk péa kơxô̆ pơla 2026-2030, kong pơlê Khánh Hòa dế mơdêk rơdêi tơ’mot ‘no liăn pêi cheăng tung mâu kơpong cheăng kâ, kơpong tíu pêi cheăng ƀă kơmăi kơmok vâ pro ivá mơnhông. Mơ’nui khế 5 kố nah, Khu Pơkuâ ngăn Kơpong pêi cheăng kâ ƀă Kơpong pêi cheăng ƀă kơmăi kơmok kong pơlê hiăng diâp hlá mơ-éa mơnhên chêh inâi ‘no liăn pêi cheăng ăm 13 tơdroăng tơkêa ƀă tâi tâng kơxô̆ liăn ‘no pêi cheăng vâ chê 7.500 rơtal liăn. Tung mê, tơdroăng tơkêa Kơpong pêi cheăng ƀă kơmăi kơmok Ninh Thọ ai ƀăng tơnêi pro 327ha, kơxô̆ liăn ‘no pêi cheăng lối 3.800 rơtal liăn, châ tơngah po rơdâ tơnêi pro tíu pêi cheăng ƀă kơmăi kơmok ƀă tơ’mot khu ‘no liăn pêi cheăng râ pá xôp.

Teăng mâ khu mơdró kâ châ rah xo pro ngế ki ‘no liăn pro tơdroăng tơkêa, pôa Nguyễn Tuấn Anh, Kăn pơkuâ Kŏng ti Tơlo liăn Kơpong cheăng ƀă kơmăi kơmok Stavian ăm ‘nâi, hlá mơéa chêh pro ‘no liăn pro nôkố châ chêh pro rĕng, tơ’lêi ăm khu mơdró kâ.

“Chiâng vâ tối cho ki tơƀrê ƀă ngin xuân ôh tá chiâng mơnhên mê ngin ai mâ a hâi kố rĕng môi tiah kố. Bu tung pơla 4 khế mê séa ngăn chêh pro mâu hồ sơ ƀă pơcháu ăm ngế ki ‘no liăn pêi cheăng mê cho môi troăng prôk ki rĕng phá tơ-ê hên”.

Rơtế ƀă tơdroăng ki tơ’mot pro mâu tơdroăng tơkêa nếo, cheăng ki lêi tah mâu tơdroăng xơpá tơvâ tơvân ‘na luât pro mơdon hâi khế pêi cheăng ăm tơdroăng tơkêa ki dế pêi nôkố xuân veăng gum ‘mâi mơnhông tơdroăng loi dêi mâu khu mơdró kâ. Hên khu mơdró kâ ki kân a Kơpong pêi cheăng kâ Vân Phong hiăng châ ‘mâi pơhlêh thăm mơnhông hâi khế pêi cheăng sap ing 50 hơnăm tâk troh 70 hơnăm.

Ƀă mâu tơdroăng tơkêa bro mâu tíu pêi cheăng ƀă kơmăi kơmok, hâi khế chêh pro klêi hlá mơ-éa ‘no liăn pêi cheăng ai pơxúa kân khât. Mơ-éa chêh pro rế rĕng, tơnêi tơníu pro tíu pêi cheăng ƀă kơmăi kơmok rế rĕng châ ăm phêp pro, tơ’lêi hlâu tơ’mot mâu khu ‘no liăn pro ƀă po rơdâ mơjiâng pro. Tiô Khu Pơkuâ ngăn Kơpong cheăng kâ ƀă Kơpong tíu pêi cheăng ƀă kơmăi kơmok kong pơlê Khánh Hòa, tơdroăng ki pêi pro tơƀrê kố cho sap ing tơdroăng pơhlêh nếo túa pơkuâ, thăm mơnhông tơrŭm cheăng pơla mâu khu râ, kơvâ cheăng ƀă tŏng gum khu mơdró kâ sap ing rôh hbrâ rơnáu mâu hồ sơ.  Pôa Trần Minh Chiến, Ngế xiâm Khu pơkuâ ngăn Kơpong cheăng ƀă kơmăi kơmok kong pơlê Khánh Hòa ăm ‘nâi:

“Rôh ki diâp ăm tơdroăng pơkâ pêi a hâi lơ 25/5 pơla kố nah sap ing rôh ki chêh inâi pêi cheăng troh rôh ki môi tuăn ăm phêp xúa troăng hơlâ mê bu ối 4 khế. Tâi tâng mâu rôh pêi cheăng ngin pơrá pro tơ’lêi hlâu kơdroh hâi khế pro sap ing 30 – 50% hlá mơ-éa chêh pro tơdroăng pơkâ”.

Pôa Lê Huyền, Phŏ hnê ngăn Vi ƀan kong pơlê Khánh Hòa ăm ‘nâi, kong pơlê dế kơjo gum mơjiâng pro troăng prôk tơdjêp ƀă mâu tíu pêi cheăng ƀă kơmăi kơmok, kơpong cheăng kâ; tơdrêng amê hlối rah xo mâu khu ki ‘no liăn pêi cheăng ai hên liăn ngân, ki rơkê plĕng ƀă kong ngê̆ vâ tơbleăng pro mâu tơdroăng tơkêa bro ki kal.

“Peăng Vi ƀan hnê ngăn kong pơlê mê ngin hiăng khŏm mơ-eăm khât, la kô mơ-eăm hên tâ nếo tung pơla rơtế prôk ƀă mâu khu mơdró kâ. Pakĭng tơdroăng ki krếo thế khu ‘no liăn pêi cheăng mê ngin xuân athế rak tơniăn tŭm mâu tơdroăng, malối cho mâu tơdroăng cheăng ki ai tơdjâk troh troăng prôk tơdjêp ƀă mâu kơpong pêi cheăng vâ tơ’lêi hlâu ăm khu ‘no liăn pro drêng tơbleăng pro mê má môi cho athế tơ’lêi hlâu má môi, ki má péa cho tơƀrê khât, tung mê tơƀrê dêi khu ‘no liăn pêi cheăng, tơƀrê dêi mâu khu ‘no liăn pêi cheăng pá kơdâm ƀă ki tơƀrê ăm tá kong pơlê”.

Sap ing tơdroăng ki pro tơ’lêi hlâu ‘na chêh pro hlá mơéa troh lêi tah mâu tơdroăng ki xơpá ‘na troăng klông ƀă tơnêi tơníu, Khánh Hòa dế rế hía rế pro tơ’lêi hlâu ăm mâu tơdroăng tơkêa bro rĕng châ tơbleăng. Kố xuân cho tơdroăng vâ kong pơlê pơtối tơ’mot kơxô̆ liăn ‘no pêi cheăng, tơmiât troh pơkâ pêi thăm mơnhông tâk péa kơxô̆ tung mâu hơnăm la ngiâ.