Klêi kơ’nâi xúa pêi cheăng, pơhlêh xúa kơxô̆ ƀă xoăng râ ăm cheăm bêng, la xuân ối ai hên xơpá ‘na mâu ngế pêi cheăng, liăn ngân ƀă hlá mơ-éa chêh pro. A rôh hôp, mâu cheăm bêng pơtroh 110 tơdroăng tối tơbleăng mâu tơdroăng ki tơvâ tơvân tung tơkŭm po kơ koan tơnêi têa, malối cho tơdroăng ki ối kal mâu ngế cheăng a mâu kơvâ kong ngê̆ thong tin, liăn ngân - ngế cheăng ‘na rak ngăn liăn ngân, tơnêi tơníu, mơjiâng pro.

Hên rơkong tối tiah kố tơdroăng ki xoăng râ tá hâi prôk rơtế ai tŭm mâu liăn ngân ƀă hnê mơhno tơdroăng ăm ăm tơtro. Maluâ kong pơlê hiăng ‘mot tơ’nôm kơxô̆ liăn lối 6.500 rơtal liăn ăm râ cheăm, hên tíu xuân tá hâi xúa tơƀrê kơxô̆ liăn ki châ pơcháu. Khánh Hòa pâ thế Tơnêi têa rĕng pơkâ troăng hơlâ gum liăn khế tiô tíu pêi cheăng, ăm phêp kĭ tơkêa tơdroăng cheăng tung hneăng apoăng ƀă pêi pro klêi troăng hơlâ tơleăng klêi mâu hngêi, tơnêi ki rơlối klêi kơ’nâi ‘mot tơkŭm kơ koan cheăng tơnêi têa.