Troh nôkố, lâp kong pơlê Khánh Hòa hiăng pêi kêi đeăng tâi tâng mâu tơdroăng tơkŭm po hbrâ ăm roh tâ phĭu rah xo kăn teăng mâ Kuô̆k hô̆i hneăng má 15 ƀă tâ phĭu rah xo kăn teăng mâ Hô̆i đong kuăn pơlê mâu râ. 65 cheăm, bêng, kơpong cheăng kâ hiăng hbrâ 1.123 kơpong tâ phĭu, tơdâng ƀă 1.123 tôh tâ phĭu. Kố cho khu ki tơdrêng pêi pro mâu tơdroăng ing tĕm inâi mơngế ki tâ phĭu, hbrâ tơmeăm khoăng troh tơkŭm po tâ phĭu, riân phĭu, tơniăn roh tâ phĭu po tro pơkâ.

Tiô Tơdroăng pơkâ dêi Hô̆i đong Tâ phĭu Tơnêi têa, Khánh Hòa châ rah xo 12 kăn teăng mâ Kuô̆k hô̆i hneăng má XVI, ƀă 20 ngế ki tơbriât to pro kăn a 4 tíu tâ phĭu. Ƀă Hô̆i đong kuăn pơlê kong pơlê hneăng hơnăm 2026 – 2031, ai 108 ngế tơbriât to pro kăn vâ rah xo 67 kăn teăng mâ. A râ cheăm, lâp kong pơlê rah xo 1.392 kăn teăng mâ. Troh nôkố, mâu cheăm bêng hiăng pêi kêi đeăng tơpui tơno tơdroăng kal kí cheăng kâ rêh ối pơlê pơla roh má pái, tơniăn tro tơdroăng vâ rah xo, mâu ngế ki vâ rah xo ƀă tơdroăng pơkâ tiô tơdroăng pơkâ.

Rơtế ƀă pêi kêi đeăng tơdroăng tơpui tơno kal kí, cheăng kâ, rêh ối pơlê pơla, tơdroăng pro ƀă tĕm inâi mơngế ki tâ phĭu châ pêi pro tơdâng tơ’mô, tơbleăng tơdrăng. A cheăm Xuân Hải, inâi mơngế ki tâ phĭu châ tĕm a 17 kơpong tâ phĭu. Khu râ kăn pơkuâ pơtối séa ngăn, chêh tơ’nôm tơdroăng, tơdrêng amê hbrâ ‘nâi tơdroăng, teăm tơleăng tơdrêng mâu tơdroăng ki nếo ai, tơniăn hnoăng ki pơxúa dêi kuăn pơlê. Pôa Nguyễn Trúc Hòa, Kăn hnê ngăn Vi ƀan cheăm Xuân Hải, kong pơlê Khánh Hòa tối ăm ‘nâi:

“Cheăm dế hbrâ tĕm inâi mâu ngế ki tơbriât to pro kăn a mâu kơpong tâ phĭu. Tung la ngiâ, Vi ƀan cheăm pơtối hnê mơhno séa ngăn, ‘nâi tơdroăng tung tâ phĭu ƀă kuăn pơlê; teăm tơdrêng tơleăng mâu tơdroăng xiâm tơdjâk troh săm tối, săm tơkêng tâng ai; tơdrêng amê thăm tơdroăng tơniăn gâk kring hdrối, tung ƀă kơ’nâi hâi tâ phĭu’’.

Ôh tá xê a kơpong tíu kơdrâm kuăn pơlê rêh ối, a mâu pơlê kĭng têa kơxĭ, tíu ai hên kuăn pơlê tơnăng ká xi xŏng đi đo lăm tơnăng ká xi xŏng tung dế têa kơxĭ ton hâi, tơdroăng riân ngăn kuăn pơlê châ pêi pro inhên tâ. Mâu tôh kuăn pơlê kơphô̆ tơrŭm ƀă khu kŏng an kơpong troh rêm rơpŏng séa pơchông tơdroăng, ‘nâi kơxô̆ mơngế pêi cheăng lăm tơnăng ká xi xŏng têa kơxĭ, hâi khế lo lăm tung dế têa kơxĭ, mot a kĭng, ing mê ai troăng mơhnhôk tơtro, tơniăn ôh tá lôi mơngế ki tâ phĭu.

A Tôh kuăn pơlê kơphô̆ Thành Đạt, bêng Nam Nha Trang, tíu ai lối 1.600 ngế tâ phĭu, tung mê lối 200 ngế pêi tơdroăng cheăng tơnăng ká xi xŏng, tơdroăng séa ngăn châ tơkŭm po đi đo, pêi tiô tơtro tơdroăng ki ai khât nôkố kuăn pơlê. Jâ Nguyễn Thị Hoa, Tôh trương Tôh kuăn pơlê kơphô̆ tối ăm ‘nâi:

“Pin tiô tơdroăng ki ai khât nôkố kuăn pơlê a cheăm, bêng. Ngin séa ngăn rêm rơpŏng. Tơrŭm ƀă Kŏng an kơpong séa ngăn ‘noăng chư chêh. Kuăn pơlê lăm têa kơxĭ sap ing 1 măng tĭng ai drêng troh 1 khế, rơpŏng tối inâi mơngế ki chiâng tâ phĭu. Ngin ngăn tiô tơdroăng ki khât mê vâ mơhnhôk mơngế ki tâ phĭu lăm tâ phĭu’’.

Rơtế ƀă tơdroăng séa ngăn inâi kuăn pơlê, tơdroăng pơtâng tối châ pêi pro rơdâ lâp lu, gum mơdêk hlê plĕng ƀă pôu râng hnoăng cheăng dêi kuăn pơlê. Loa pơtâng tối tơdroăng dêi cheăm, pơlê, mâu khu pơkuâ droh rơtăm, khu pêi cheăng a cheăm, pơlê rah pơtâng tối đi đo, gum mơngế ki tâ phĭu ‘nâi nhên hâi, chôu phut, tíu tâ phĭu, xuân môi tiah tơdroăng pêi cheăng dêi mâu ngế ki tơbriât to pro kăn.

Sap hâi lơ 26/2 troh hâi lơ 14/3, mâu tíu cheăng, cheăm bêng tơkŭm po roh hôp trâm mâ mơngế ki tâ phĭu, pro tơ’lêi vâ mâu ngế ki tơbriât to pro kăn châ pêi pro hnoăng mơhnhôk tâ phĭu tiô pơkâ, tơdrêng amê gum mâu ngế ki tâ phĭu hlê plĕng nhên tâ ‘na ngế ki tơbriêt to pro kăn hdrối pêi pro hnoăng rah xo. Pôa Võ Chí Vương, Kăn pơkuâ Khu pơkuâ kăn ƀô̆ kong pơlê Khánh Hòa tối ăm ‘nâi:

“Pơtâng tối đi đo sap ing kố troh hâi tâ phĭu, loa pơtâng tơdroăng kal dêi cheăm mơ’no đi đo rêm hâi mâu tơdroăng xiâm ‘na tâ phĭu rah xo kăn pêi cheăng vâ kuăn pơlê pâ troh tơdroăng tâ phĭu, pâ hâi lơ 15/3 lăm tâ phĭu. Klêi kơ’nâi tơbleăng inâi mâu ngế ki tơbriât to pro kăn, thế pơchuât đi đo inâi ngế ki tơbriât to pro kăn’’.

Klêi kơ’nâi séa ngăn tơdroăng hbrâ a cheăm, bêng, khu râ kăn pơkuâ kong pơlê Khánh Hòa pơkâ mâu cheăm bêng pơtối séa ngăn tiô tơdroăng ki ai khât nôkố, hbrâ ‘nâi troăng tơmiât pói vâ dêi mơngế ki tâ phĭu, tơdrêng amê, thăm pơtâng tối, mơjiâng tơdroăng môi tuăn ƀă môi tuăn tung Kuăn pơlê, veăng gum châ tơƀrê tơdroăng tâ phĭu rah xo kăn pêi cheăng. Pôa Trần Phong, Kăn hnê ngăn Vi ƀan kong pơlê Khán Hòa tối rơdêi:

‘’Ƀă tơdroăng tâ phĭu rah xo kăn pêi cheăng mê pơtâng tối hnoăng ki kal khât, pơtâng tối vâ kuăn pơlê hlê plĕng ‘na ki kơnâ dêi roh tâ phĭu, môi pâ vâ kuăn pơlê hlê plĕng ‘na hnoăng, hnoăng ki châ pơxúa dêi mơngế tâ phĭu. Ing mê, vâ kuăn pơlê hlê plĕng, vâ môi tuăn, lăm tâ phĭu’’.

Ƀă tơdroăng hbrâ tơdâng tơ’mô, krá tơniăn, Khánh Hòa dế pêi kêi đeăng tâi tâng mâu tơdroăng cheăng tro tiô pơkâ mơ’no, tơniăn rêm ngế ki tâ phĭu pơrá châ veăng tâ phĭu, gum tung tơdroăng châ tơƀrê dêi Hâi xah hêi ro tâ phĭu ƀă mơjiâng khu râ kăn pơkuâ krá tơniăn ó rơdêi.