Nếo achê kố, A Hà Nội, Khu pơkuâ tơdroăng Tơnêi têa tơrŭm ƀă Khu ki in mơ-éa kal kí Tơnêi têa tơkŭm po Leh mơđah tơbleăng kơxop mơ-éa dêi pôa Nguyễn Phú Trọng, Kăn xiâm pơkuâ hnê ngăn Đảng dó inâi ‘’Khŏm pêi, khŏm mơ-eăm hbrâ mơdât kâ kơhveăm liăn ngân, tơdroăng ki ôh tá lĕm tro, veăng kum mơjiâng Đảng ƀă Tơnêi têa pin rế hía rế krúa lĕm, ó rơdêi’’.

Kơxop hlá mơ-éa dêi pôa Nguyễn Phú Trọng, Kăn xiâm pơkuâ hnê ngăn Đảng châ kêi chêh ai 600 trang, 111 um pơto pơtih. Tơdroăng rah chêh, in hiăng pêi pro hên tơdroăng ki nhên, hluâ hên troăng pêi krá păng ‘nâng, rơkê tơtro, khoa hok vâ Kơxop hlá mơ-éa rak tơniăn pơkâ ‘na ki dâi lĕm, tơdroăng xiâm, pakong ƀă tơdroăng ki in.

Pôa Nguyễn Túc, Kăn cheăng tung khu Kăn xiâm hnê ngăn Vi ƀan xiâm Măt trâ̆n Tơnêi têa Việt Nam tối, kơxop mơ-éa lo pa kong mơjiâng troăng ki kân ‘na hlê plĕng tung tâi tâng kuăn pơlê. Ing mê, pêi pro roh tơplâ mơdât kâ kơhveăm liăn ngân tung hneăng nếo, mê amê tâi tâng kuăn pơlê veăng vâ pêi pro ăm pơkâ “ôh tá khên”, “ôh tá vâ”, “ôh tá kal” ‘na kâ kơhveăm liăn ngân.

Pôa Nguyễn Túc tối:

“Kâ kơhveăm liăn ngân, pro ăm kuăn pơlê pin tăm nâ, hêng hôu, môi tiah Kăn xiâm pơkuâ hnê ngăn Đảng hiăng tối, tơplâ mơdât kâ kơhveăm liăn ngân hiăng chiâng tơdroăng ôh tá chiâng pro tơrôu drêng tâi tâng kuăn pơlê hiăng veăng. Xua mê, tơdroăng chêh tối kơxop mơ-éa kố, cho môi roh vâ mơdêk tâ mê nếo hlê plĕng dêi tâi tâng Đảng, tâi tâng kuăn pơlê, tâi tâng khu lêng pin ‘na tơdroăng tơplâ mơdât lêng ‘mêi tung tơnêi têa, khŏm pêi ƀă khŏm mơ-eăm pro ăm á pâ tâi tâng tung ngôa’’.

*** Nếo a chê kố, Đảng ủy Khô̆i mâu kơ koan Tơnêi têa tơkŭm po Rôh hôp hriăn ngăn, hriâm tâp, pơkâ ƀă hnê tối tơdroăng ki kal dêi kơxop hlá mơéa ‘’Khŏm mơeăm, kơhnâ tơplâ hbrâ mơdât kâ kơluâ, veăng kum mơjiâng Đảng ƀă Tơnêi têa pin rế hía rế krúa rơdêi’’ dêi pôa Nguyễn Phú Trọng, Kăn xiâm pơkuâ hnê ngăn Đảng.

Tơpui mơgêi rôh hôp, pôa Nguyễn Văn Thể, Kăn pơkuâ ngăn Đảng ủy Khô̆i mâu kơ koan Tơnêi têa pơkâ thế, klêi kơ’nâi Rôh hôp kố, rêm râ pơkuâ Đảng, khu tơrŭm Đảng tơkŭm hnê mơhno tơkŭm po tro mâu tơdroăng hôp kal kí ‘na tơdroăng kal kơxop hlá mơ-éa dêi pôa Nguyễn Phú Trọng a kơ koan, tíu pêi cheăng.

Ing mê tơpui, xúa tung tơdroăng ki ai khât ‘na hnoăng cheăng mơjiâng ‘mâi rơnêu Đảng, tơplâ mơdât, kâ kơluâ dêi kơ koan, tíu pêi cheăng tung la ngiâ.

“Tâi tâng Đảng ƀô̆ Khô̆i athế hriâm kơtăng ‘na kơxop hlá mơ-éa dêi Kăn xiâm pơkuâ hnê ngăn Đảng. Ing mê, rêm ngế kăn ƀô̆ đảng viên athế pêi pro ăm gá tro. Kố cho rôh ôh tá chiâng pơtê, xua mê, tâi tâng kăn ƀô̆ đảng viên, ngế pêi cheăng tung tâi tâng Đảng ƀô̆ Khô̆i pơtối tơbleăng, pơkâ vâ pin ăm tâi tâng hiâm mơno hnê mơhno dêi kăn xiâm pơkuâ hnê ngăn Đảng tung kơxop hlá mơ-éa châ pêi pro tung tơdroăng rêh ối ƀă veăng kum mơjiâng Đảng mơjiâng Tơnêi têa rế hía rế krúa rơdêi’’.