Tiô Vi ƀan hnê ngăn Xiâm Măt trâ̆n Tơnêi têa Việt Nam, hơnăm 2022, kơpong hdroâng kuăn ngo a mâu kong pơlê Tây Nguyên hiăng hlo tơniăn ‘na gâk kring kal kí, tơniăn tung lâp pơlê pơla. Mâu tơdroăng tơkŭm po, tơdroăng tơkêa kum ăm kơpong hdroâng kuăn ngo ƀă peăng kong ngo mơdêk tơƀrê; mâu tơdroăng tŏng kum rêh ối pơlê pơla, kum mâu kơtiê châ tơmâng ngăn khât. Teăng mâ cho mâu ngế ki châ kuăn pơlê loi nhuô̆m, mâu ƀok xối a mâu kong pơlê Tây Nguyên, hiăng veăng kum ăm rơkong tơpui tối, pâ thế ‘na hên tơdroăng môi tiah: tŏng kum liăn tơ’nôm ăm mâu ngế ki châ kuăn pơlê loi nhuô̆m, kăn ƀô̆ pơkuâ thôn, pơlê, hnoăng cheăng hnê cheăng pêi ăm mâu ngế pêi cheăng kơpong xơpá, hdroâng kuăn ngo; rak tơniăn tơnêi pêi kâ vâ kuăn pơlê hdroâng kuăn pêi chiâk deăng; mơdêk kơxô̆ liăn ‘no vâ mơnhông ôm hyô pơlê pơla; troăng hơlâ rak vế kong; tơdroăng ki rah xo kuăn ‘nĕng hdroâng kuăn ngo ƀă hên ki ê.

Klêi kơ’nâi hmâng mâu tơdroăng tơpui tối, pâ thế dêi mâu kăn, pôa Đỗ Văn Chiến, kăn hnê ngăn Vi ƀan xiâm Măt trâ̆n Tơnêi têa Việt Nam ăm ‘nâi, Vi ƀan xiâm Măt trâ̆n Tơnêi têa Việt Nam rơtế ƀă mâu kơ koan tơmâng xo tâi tâng mâu tơdroăng ki tơpui tối, pâ thế dêi mâu kăn tơdrêng amê hlối rơhêng vâ, kuăn pơlê hdroâng kuăn ngo Tây Nguyên pơtối tơrŭm, rơtế mơjiâng Tây Nguyên rế hía rế mơnhông tâ.