Kơxêi hâi lơ 8/5, Khu kăn Kuô̆k hô̆i kong pơlê Dak Lak hiăng tơkŭm po hôp trâm mâ kuăn pơlê vâ tơmâng xo tơdroăng veăng hnê tối dêi kuăn pơlê ‘na Luât tơnêi tơníu ki (‘mâi hơ’lêh) hdrối vâ po hôp roh má 5, Kuô̆k hô̆i  hneăng 15. A rôh trâm mâ, pôa Đinh Văn Khiết, Ngế xiâm phŏ hnê ngăn Vi ƀan kong pơlê Dak Lak tối, mâu pơkâ pơhlêh nếo tung hlá mơ-éa luât tơnêi tơníu (‘mâi hơ‘lêh) kô pro ki môi tuăn, tơdâng tơniăn ki pơxúa tung pơkâ vâ hdró xúa tơnêi.

Laga, krê to ƀă kơpong Tây Nguyên, kơpong ai krâm kuăn ngo rêh ối, luât kal pơkâ nhên ‘na pro ăm hlá mơ-éa mơnhên xúa tơnêi ƀă hnoăng xúa tơnêi vâ khu ngế mê ai hnoăng  pêi pro tung tơdroăng  xúa tơnêi pêi kâ ai pơxúa teăng tơdroăng châ ăm klêi mê pơ’lêh ăm mâu ki ê.

Xuân a hneăng hôp, hên kuăn pơlê pâ thế tối nhên troăng rơhlâ tơleăng mơnhên ƀă mâu tơnêi xua mâu nông lâm trường rak ngăn la kuăn pơlê ki dé xúa pêi, tơniăn tơ tro ƀă hnoăng ki pơxúa rêm pâ.