Klêi kơ’nâi mơgêi hneăng hôp má 5, Kuô̆k hô̆i hneăng XV, hâi lơ 27/6 mâu kăn Kuô̆k hô̆i kong pơlê Dak Lak hiăng ai mâu rôh trâm mâ kuăn pơlê a mâu tơring Čư̆ Mgar, Lak, Krông Bông ƀă pơlê kong kơdrâm Ƀuôn Ma Thuột. A mâu tơring, tơdroăng ki kuăn pơlê vâ hlê plĕng hên má môi cho tơdroăng ki tơdjâk troh gâk kring tơdroăng kal kí ƀă tơniăn tung lâp pơlê pơla, malối cho klêi kơ’nâi rôh ki bro ôh tá tơniăn a tơring Čư̆ Kuin, kong pơlê Dak Lak.

Mâu kuăn pơlê tối tiah kố, tơdroăng ki trâm a pơla hdrối kố nah hiăng châ tơdroăng ki tơmâng ngăn, pơxâu phâk teăm tơdrêng dêi khu lêng ki ai tơdjâk troh ƀă khu kăn pơkuâ, bro tơdroăng ki hmiân tuăn, môi tuăn sap ing kuăn pơlê. Laga, kố xuân cho tơdroăng ki ôh tá tơniăn khât, cho ƀai hriâm vâ tá khu pơkuâ tơdroăng kal kí kal mơdêk dêi hiâm mơno tơrŭm, kơchăng ƀă mâu tơdroăng pêi pro ôh tá tro dêi khu ‘mêi.

Tơmâng xo ƀă mơnhên tối mâu rơkong tơpui tối dêi kuăn pơlê, khu kăn Kuô̆k hô̆i kong pơlê Dak Lak hiăng pơkâ thế mâu kơ koan ai hnoăng pơkuâ ƀă kong pơlê tơpui tối tơbleăng . Ƀă mâu tơdroăng ki ê, khu kố kô chêh tơkŭm, pâ thế troh Kuô̆k hô̆i, Chin phuh ƀă mâu Khu xiâm pơkuâ cheăng tung mâu hneăng hôp ki pơtối.