Kơxê lơ 16/5, Khu kăn Kuô̆k hô̆i kong pơlê Kon Tum tơrŭm ƀă Khu pơkuâ ngăn Vi ƀan Măt trâ̆n Tơnêi têa Việt Nam kong pơlê Kon Tum ƀă Khu pơkuâ tơdroăng pêi cheăng kong pơlê tơkŭm po Rôh hôp trâm mâ ‘na tơdroăng xiâm ƀă vâ chê 100 ngế kuăn pơlê cho mâu kŏng nhân pêi cheăng. Klêi kơ’nâi Khu kăn Kuô̆k hô̆i kong pơlê Kon Tum tối tơbleăng ăm vâ chê 100 ngế kŏng nhân pêi cheăng ‘na tơdroăng cheăng dêi Khu kăn Kuô̆k hô̆i kong pơlê; tiô tối hdrối tơdroăng kố, tơdroăng ki kal hneăng hôp má 5, Kuô̆k hô̆i hneăng má 15 po a hâi lơ 22/5 la ngiâ, Khu pơkuâ ngăn mâu ngế pêi cheăng kong pơlê Kon Tum hiăng pơchuât tâi tâng mâu rơkong tơpui tối, pâ thế dêi kŏng nhân pêi cheăng tung kong pơlê ăm mâu kăn Kuô̆k hô̆i.

Tiah mê, kuăn pơlê cho kŏng nhân pêi cheăng kong pơlê 6 khu tơdroăng ƀă 38 tơdroăng ki kal, mê cho: Khu hnoăng cheăng hnê mơhno, pêi pro troăng hơlâ tŏng kum; Khu kơvâ pei chiâk deăng, pêt kong; Khu mơjiâng bro tê mơdró tơmeăm; Khu kơvâ khăm pơlât; Khu kơvâ hnê hriâm ƀă hnê cheăng ƀă Khu troăng hơlâ tŏng kum rêh ối pơlê pơla.

A rôh hôp Khu xiâm pơkuâ ngăn tơdroăng pêi cheăng Việt Nam diâp tơmeăm ăm 33 ngế kŏng nhân pêi cheăng ai tơdroăng rêh ối xơpá tung kong pơlê. Rêm hnoăng kơnâ 1 rơtuh liăn mâ ƀă 200 rơpâu liăn roê kế tơmeăm.