Hneăng tơ’noăng mơgêi hriâm râ má pái phôh thong hơnăm kố kong pơlê Kon Tum ai 5.028 ngế hok tro veăng tơ’noăng, tung mê, ai lối 1.700 ngế hok tro kuăn ngo. Lâp tung kong pơlê ai 12 tíu tơ’noăng ki khât ƀă 224 veăng tơ’noăng ƀă 9 tíu tơ’noăng hbrâ ƀă 184 veăng tơ ‘noăng.

Hâi lơ 28/6, khu lăm séa ngăn ‘na tơdroăng hnê mơhno, tơkŭm ngăn tơ’noăng  mơgêi hriâm râ má pái phôh thong hơnăm 2023 dêi Khu xiâm ngăn hnê hriâm ƀă hnê mơjiâng tuăn ngôa rơkê xua Thiếu tướng Nguyễn Văn Thế, Kăn phŏ hnê ngăn Đảng dêi hngêi trung Đại học Nguyễn Huệ, Khu xiâm pơkuâ ngăn lêng pro ngế xiâm pơkuâ djâ khu kăn lăm pêi cheăng ƀă Hô̆i đong ngăn tơ’noăng Khu xiâm ngăn hnê hriâm ƀă hnê mơjiâng tuăn ngôa rơkê kong pơlê Kon Tum, hlối séa ngăn vâ ‘nâi khât a mâu tíu tơ’noăng.

Khu kăn mê ăm ‘nâi, Kong pơlê Kon Tum hiăng hbrâ môi hneăng tơ’noăng mơgêi hriâm râ má pái phôh thong tơniăn, kơtăng. Hô̆i đong ngăn tơ’noăng Khu xiâm ngăn hnê hriâm ƀă hnê mơjiâng tuăn ngôa rơkê kong pơlê Kon Tum  hiăng pêi kơtăng ƀă tơkŭm pêi tro mâu hlá mơ-éa hnê mơhno dêi Ngế pro xiâm hnê ngăn Chin phuh, luât pơkâ, hnê dêi Khu xiâm ngăn hnê hriâm ƀă hnê mơjiâng tuăn ngôa rơkê tơnêi têa ‘na hneăng tơ’noăng mơgêi hriâm râ má pái phôh thông hơnăm 2023 achê ƀă tơdroăng ki ai khât.

Khu kăn kô tơrŭm krá tơniăn ƀă mâu kơvâ cheăng dêi kong pơlê vâ pơxâu phâk teăm tơdrêng tâng lơ ai tơdroăng pro oh tá tro vâ tơniăn ăm hneăng tơ’noăng pôi tá ai tơdroăng klâi.