A hngêi kơmăi uâ pơliê kơphế dêi kŏng ti veăng tơlo liăn  cheăng ƀă mơnhông An Thái, mâu tơdroăng uâ kơphế tơpoăng ƀă pro kơphế hơ’lâk ôu hlối pêi cheăng đi đo vâ teăm ai kơphế pơcháu ăm peăng mâu ki rôe dêi mâu kong têa. Pôa Nguyễn Xuân Lợi, Ngế pơkuâ kong ti ăm ‘nâi, mâu tơmeăm ki tê apoăng hơnăm hiăng châ pê klêi, tơmeăm hiăng châ chơ troh a kơno tuk, pơxiâm hlo apoăng ki hlâu ăm tơdroăng pơkâ pêi cheăng tâk tung hơnăm 2026.

“Khu mơdró đi đo hbrâ tăng ‘nâi plĕng, tăng ‘nâi mâu tơdroăng vâ xúa tơƀrê mâu luât pơkâ, luât tŏng kum dêi tơnêi a tơdroăng pêi pro tê mơdró. Kố cho tơdroăng mơ-eăm ki kal vâ ngin pơtối po rơdâ kơchơ mơdró, mơdêk ki tơbriât cheăng ƀă mơnhông krá tơniăn tung la ngiâ”.

Hơnăm 2025, Dak Lak tê tơmeăm ăm kong têa ê châ dâng 2,8 rơtal USD, tâk vâ chê 40% tâng vâ pơchông ƀă hơnăm hdrối, tung mê tơmeăm pê lo ing chiâk deăng pơtối rak cho ki xiâm ƀă mâu tơmeăm mê cho kơphế, sầu riêng, ca cao, mắc ca... Ki tơƀrê mê thăm tơ’nôm ivá mơ-eăm vâ Khu mơdró loi khât pơxiâm mot tung hơnăm pêi cheăng ki nếo. Pôa Nguyễn Tiến Dũng, Phŏ pơkuâ ngăn kŏng ti pêi cheăg tiô rơnó Môi tung khu tê rê tơmeăm kong têa ê lơ 9-2 Dak Lak (Simexco Daklak) ăm’nâi, cho khu mơdró tơnêi têa ki djâ troăng ahdrối tung tê tơmeăm pê lo ing chiâk deăng tê ăm kong têa ê ăm ‘nâi, Khu mơdró tơnêi têa pêi pro ahdrối tung tê tơmeăm ki pê lo ing chiâk deăng, mot tung hơnăm 2026, khu mơdró pơtối mơdêk tơrŭm cheăng ƀă mâu khu tơrŭm cheăng lâp plâi tơnêi vâ mơnhông kơphế ki xú lĕm krê, po rơdâ  kơchơ mơdró ƀă mơdêk ki kơnâ dêi kơphế kong pơlê.

“Ngin ai môi troăng pêi nhên, mê cho troăng hơlâ vâ mơnhông tơƀrê kơxô̆ pê lo, mơdêk tơƀrê ki lĕm ăm kuăn pơlê ki pêi chiâk xuân môi tiah tơdroăng tơrŭm dêi ngin vâ pro xiâm kơphế xú lĕm krê dêi Việt Nam kô châ troh lâp lu plâi tơnêi”.

Tơdrêng ƀă mâu khu mơdró kơphế, hên khu pêi cheăng tơrŭm cheăm pêt loăng plâi xuân tối hlo ki tơƀrê. A khu pêi cheăng tơrŭm Xanh Cao Nguyên, cheăm Čư̆ Mgar, kong pơlê Dak Lak, krui kơxái nếo klêi krí dế tung rơnó tê ăm kong têa Sinuâ, Mih ƀă Canada... Pôa Văn Thanh Bình, Ngế pơkuâ Khu pêi cheăng tơrŭm ăm ‘nâi,  tơdrêng ƀă tê ăm kong têa ê plâi krui kơxái nếo klêi krí, khu pêi cheăng tơrŭm dế ‘no liăn pro hngêi kơmăi xếo têng pro vâ mơdêk rak ki lĕm tơmeăm tê ăm kong têa ê.

“Pakĭng tê plâi drêh ăm kong têa ê, khu pêi cheăng tơrŭm dế ‘no liăn mơjiâng pro hngêi kơmăi vâ xếo krúa têng khăng ƀă tiê xo têa krui kơxái tê ăm kong têa ê. Khu pêi cheăng tơrŭm xuân pêi tiô troăng monhông mâu tơmeăm ki têng pro tiê xo têa ing plâi krui kơxái môi tiah tơmeăm ki lĕm krê mơdêk ki pơxúa dêi tơmeăm pêi lo ing chiâk. Vâ tơniăn plâi lĕm, khu pêi cheăng tơrŭm hiăng mơnhông tơrŭm ƀă mâu khu ƀă po rơdâ kơpong pêt krui kơxái tiô troăng hơlâ tơkŭm, pêi ăm tơdroăng têng pro tê ăm kong têa ê tơniăn ton hơnăm”.

Tơdrêng pêi pro ‘na ki pơxúa, tơmeăm pêi lo ƀă ki tơbrê tơmeăm pê lo tê ăm kong têa ê, mâu khu mơdró tơmeăm pêi lo ing chiâk deăng a Dak Lak xuân tơƀrê iâ tung têng pro lĕm trâu tâ. Tiô pôa Hoàng Danh Hữu,  Kăn xiâm hnê ngăn Hô̆i đong tung khu, Kŏng ti pêi cheăng tiô rơnó tê mơdró Êđê, têng pro lĕm trâu tâ kum mâu khu mơdró tê hên tơmeăm, tăng kơchơ mơdró nếo, mơnhông inâi. Mâu khu mơdró púi vâ châ rôe hên tơmeăm ing mâu rôh tê mơdró, Pôa Hoàng Danh Hữu tối:

“Ngin xuân púi vâ Khu xiâm ngăn tê mơdró mơnhông rơdêi mâu tơdroăng tê mơdró pơla péa pâ ƀă mâu kong têa ƀă nôkố pin dế tơrŭm ƀă mâu khu hlối tơrŭm tung tŭm tơdroăng, vâ mơnhông tơmeăm rôe xúa tung mê ai kơphế dêi Việt Nam châ tê a mâu kong têa ki mê teăng bú tơpui tơno mâu tơdroăng kĭ tơhrâ tê mơdró tơniăn krê tơdjuôm mê pin hôm tơpui tơno pơla péa pâ hên tâ vâ ai mâu luât pơkâ kơjo kum’’.

Hơnăm 2026, Dak Lak pơkâ kơxô̆ liăn châ xo tê kế tơmeăm ăm kong têa ê châ lối 2,9 rơtal USD, tơkŭm po rơdâ kơchơ mơdró hlối mơdêk ki pơxúa tơmeăm pê lo ing chiâk deăng ing têng pro lĕm trâu tâ. Ƀă ki mơ-eăm pê lo hên sap hâi apoăng hơnăm, khu mơdró kế tơmeăm pê lo ing chiâk deăng kong pơlê dế mơhno ăm hlo nên ki mơ eăm mơnhông tơƀrê ki lĕm, mơjiâng inâi ƀă djâ tơmeăm pêi lo ing chiâk deăng Dak Lak châ tê hơngế tâ troh mâu kong têa tung lâp plâi tơnêi.

Tơdroăng kố veăng mơdêk tơ’mot kơxô̆ liăn pê lo ăm kuăn pơlê, khu mơdró ƀă mơnhông cheăng kâ - pơlê pơla dêi kong pơlê troh ki mơnhông tơƀrê péa kơxô̆ tung hơnăm la ngiâ.