Khu râ kăn hiăng séa ngăn nhên a Kơpong hngêi kơmăi Hòa Phú, Kơpong hngêi kơmăi Phú Xuân ƀă Tơdroăng tơkêa bro Hngêi pơkeăng kân Ƀuôn Hồ. Xông tơpui a roh séa ngăn, pôa Lương Nguyễn Minh Triết, Kăn pơkuâ hnê ngăn cheăng Đảng kong pơlê Dak Lak tối rơdêi mâu kơpong kơmăi kơmok rak hnoăng ki kal tung mơdêk mơnhông kơmăi kơmok, pơhlêh tơdroăng cheăng kâ ƀă tăng cheăng pêi.

Pôa Lương Nguyễn Minh Triết pơkâ thế Vi ƀan kong pơlê hnê mơhno mâu tíu pêi cheăng, kơvâ cheăng thâ tah lôi pá puât, mơdêk tơdroăng mơjiâng pro troăng kân ki xiâm a Kơpong hngêi kơmăi kơmok Hòa Phú, kơmăi hrik chuâ têa krúa, hngêi kơmăi mơgrúa xok tơkŭm; tơdrêng amê rĕng rah khu mơ’no liăn hngêi trăng, troăng klông Kơpong hngêi kơmăi kơmok Phú Xuân.