VOV4.Xơ Đăng - Kơxo lơ 29/9, Khu pơkuâ Đảng ƀô̆ Pơlê kong kân Hồ Chí Minh hneăng má XI hơnăm 2020 – 2025 tơkŭm po Hneăng hôp roh má 17, vâ mơgêi pơtân 1 hơnăm pêi pro Pơkâ kơxô̆ 05 dêi Khu pơkuâ Đảng ƀô̆ pơlê kong kân ‘na pơkâ pêi tâi tâng hbrâ mơdât pơreăng COVID-19 ‘na pro tơniăn cheăng kâ tung Pơlê kong kân Hồ Chí Minh. Pakĭng mê, Hneăng hôp xuân séa ngăn mơnhên tơdroăng cheăng kâ – rêh ối pơlê pơla pơlê kong kân 9 khế hiăng hluâ ƀă hnoăng cheăng troăng pêi ki xiâm 3 khế mơ’nui hơnăm rơtế mâu tơdroăng xiâm ki kal ki ê.

Pôa Nguyễn Văn Nên, Kăn pơkuâ hnê ngăn cheăng Đảng pơlê kong kân xông tơpui pơxiâm po hneăng hôp

Pơxiâm po hneăng hôp, pôa Nguyễn Văn nên, kăn cheăng tung Khu xiâm kal kí, Kăn pơkuâ hnê ngăn cheăng Đảng Pơlê kong kân Hồ Chí Minh tối mâu tơdroăng châ tơƀrê troh nôkố ƀă cho kal khât, hôm tŭm tâi tâng, phiu ro ƀă tơdroăng loi tơngah chôa ‘lâng tơtêk. Laga, pôa Nguyễn Văn nên pơkâ thế, tung rêm kơvâ cheăng kal hvái ngăn ƀă tí tăng mâu tơdroăng ki vâ mơnhông mơdêk, ki má lối cho tơdroăng hlê plĕng tŭm pêi pro tơdroăng pêi dêi rêm kơvâ cheăng, rêm pơlê kong krâm.

VOV/Tơplôu: A Sa Ly