VOV4.Xơ Đăng - Drêng troh leh tơbâ 66 hơnăm Hâi pêi pro Khu tơrŭm Droh rơtăm hơnăm ối nếo Việt Nam, a tơring M’Drak, Khu pơkuâ ngăn Đoân Droh rơtăm Dak Lak tơkŭm pêi mâu tơdroăng cheăng pêi pro troh hâi tơbâ Khu droh rơtăm pêi pro ƀă hên tơdroăng ai pơxúa khât.  Khu pơkuâ ngăn Đoân Droh rơtăm Dak Lak hiăng tơkŭm tơpui tơno, pơcháu hnoăng cheăng pêi krâ pul on tơhrik a troăng pơlê a thôn 2, cheăm Ea Hmlay, tơring M’Drak.

Troăng kơxái on tơhrik hnhâng pro xŏn 1km, mê ai 20 to pul on đĕng kơtâu ing mâ hâi châ krâ ‘măn a mâu trăng on tơhrik drô troăng xiâm tung thôn, tâi tâng kơxô̆ liăn pro tâi 45 rơtuh liăn; pơxiâm pro 2 toăng hngêi Khăn quàng đỏ ăm hok tro kơtiê xơpá a 2 to cheăm Ea Riêng ƀă Cư Mta, tơring M'Drăk, rêm toăng hngêi kơnâ 60 rơtuh liăn.

Pơxiâm mơjiâng pro Hngêi khăn quàng đỏ ăm hok tro kơtiê xơpá

Rôh kố, a tâi tâng mâu khu pơkuâ ngăn Đoân Droh rơtăm tơring ƀă khu ngăn đoân cheăm tung kong pơlê Dak Lak xuân tơkŭm pêi mâu tơdroăng cheăng hâi mâu droh rơtăm rơtế pêi hên tơdroăng cheăng ki pơxúa khât mơjiâng pro hngêi tuăn pâ, hngêi kum mâu kơtiê; mơgrúa hyôh kong prâi, pơcháu tíu pro têa krúa,  hbru tơmeăm, ăm hok tro kơtiê hnoăng liăn hriâm.

VOV Tây Nguyên/Tơplôu: Gương