A roh trâm mâ mâu kăn teăng mâ hiăng châ tối ‘na tơdroăng nếo ai lâp plâi tơnêi ƀă kơpong, mâu tơdroăng châ tơƀrê má môi ‘na tung tơdroăng mơnhông mơdêk cheăng kâ dêi kong pơlê Dak Lak hơnăm 2022, mơnhên troăng mơnhông mơdêk hơnăm 2023 ƀă mâu hơnăm pơtối nếo. Hơnăm 2022, tơdroăng cheăng kâ – rêh ối pơlê pơla dêi kong pơlê Dak Lak hiăng rak tơniăn tro ƀă châ hên mâu tơdroăng tơƀrê tŭm túa tung hên kơvâ cheăng. Tâi tâng pơkâ ki hên tiô Pơkâ mơ’no hiăng pêi pro châ tŭm.

Hơnăm 2023, Dak Lak mơ-eăm tơtêk cheăng kâ châ dâng 8% tâng pơchông ƀă tiô tối hdrối pêi pro hơnăm 2022. Xông tơpui a roh trâm mâ, pôa Võ Văn Cảnh, Kăn phŏ hnê ngăn Vi ƀan kong pơlê Dak Lak mơnhên: vâ châ mâu pơkâ kố, pakĭng tơdroăng mơ-eăm ki kân tâ, tung pơkuâ, hnê mơhno, pêi pro hnoăng cheăng dêi mâu khu râ kăn pơkuâ hnê ngăn cheăng Đảng, khu râ kăn pơkuâ, kuăn pơlê ƀă khu mô đô̆i dêi kong pơlê xuân kal athế pêi pro hên tơdroăng cheăng ki kân hngăm tâ.

Tơdrêng amê, khu râ kăn pơkuâ kong pơlê pói vâ pơtối châ tơdah tơdroăng tơmâng hên tâ mê nếo dêi mâu kăn ƀô̆ râ kăn xiâm râ mô đô̆i vâ Dak Lak rĕng kêi đeăng mâu pơkâ mơnhông mơdêk cheăng kâ, rêh ối pơlê pơla hiăng pơkâ mơ’no.