Hâi lơ 16/5, Khu râ kăn teăng mâ Kuô̆k hô̆i kong pơlê Dak Lak hiăng tơkŭm po Hneăng hôp tơmâng xo rơkong tơpui mâu tơdroăng tơkêa bro luât tối hdrối châ Kuô̆k hô̆i pơkâ mơ’no tơpui tơno a hneăng hôp má 5, Kuô̆k hô̆i hneăng má XV. A hneăng hôp, mâu kăn teăng mâ hiăng veăng tơpui hên tơdroăng xiâm ki kal khât tơdjâk troh Luât troăng hyôh măng (‘mâi rơnêu); Luât ‘na têa (‘mâi rơnêu); Luât mâu khu ki ăm mung liăn (‘mâi rơnêu); Luât pơkuâ, gâk ngăn tơmeăm cheăng lêng ƀă kơpong cheăng lêng; Luât tê mơdró tơnêi (‘mâi rơnêu); Luât hngêi ối (‘mâi rơnêu).

Veăng tơpui ‘na Luât tê mơdró tơnêi (‘mâi rơnêu), hên mâu kăn tối: Ƀă mâu pơkâ nếo, kô mơjiâng luât tŭm, tơdâng, môi tuăn vâ pơkuâ tíu mơdró tơnêi, tŏng kum, thăm pêi pro rơdêi tíu mơdró tơnêi mơnhông mơdêk. Laga, vâ mơdêk hnoăng, mơdêk ivá pơkuâ dêi kơ koan pơkuâ tơnêi têa ‘na tơdroăng tê mơdró tơnêi luât kal tơ’nôm tơdroăng xiâm séa ngăn tơdroăng pêi pro luât ‘na tê mơdró tơnêi.

Khu râ kăn teăng mâ Kuô̆k hô̆i kong pơlê hiăng mơnhên mâu rơkong veăng tơpui dêi mâu kăn teăng mâ ƀă mâu tơdroăng tơkêa bro luât, tơkŭm tâi tâng vâ tơbleăng a hneăng hôp la ngiâ.