Tiô tơdroăng tối tơbleăng dêi Khu pơkuâ ngăn Đoân Droh rơtăm kong pơlê Dak Lak, tung 6 khế apoăng hơnăm kố, khu rơxông nếo lâp kong pơlê hiăng tơkŭm pêi pro châ lối 4 rơpâu tơmeăm khoăng, hnoăng cheăng dêi khu droh rơtăm pêi pro mê pro pơxúa châ lối 7 rơtal 200 rơptuh liăn.

Ki nhên, rêm râ khu Đoân tung lâp kong pơlê hiăng mơjiâng 17 toăng hngêi hơ-ui kum, hngêi kên khêi; pro 17km troăng krâ on tơhrik vâ pro bâ troăng pơlê, 23 kơpong xah ôm hêi ăm vâi hdrêng; kum hên kơtuh hlá mơ-eá ngăn pơchuât ăm vâi hdrêng; sơng, ‘mâi rơnêu lối chât toăng hngêi túa lĕm tro, hngêi hôp tơdjuôm pơlê. Mâu tơdroăng “Hâi tơdrốu pleăng hnoăng cheăng”, “Hâi tĭng pêi viâ hên tơdroăng cheăng lâp tơnêi têa” hiăng châ tơkŭm pêi pro adrêng, tơ’mot hên vâi đoân viên, droh rơtăm veăng pêi tung hnoăng cheăng rak vế tơnêi tíu hyôh kong prâi, hbrâ mơdât ƀă tơdroăng ki hơ’lêh dêi hyôh kong prâi.

Rêm khu pơkuâ ngăn Đoân tung lâp kong pơlê hiăng diâp lối 20 rơpâu hnoăng tơmeăm, vâ chê 3 rơpâu hnoăng liăn hriâm, kum rơxế mái ăm kuăn pơlê, vâi hdrêng; tơkŭm khăm pơlât tơdroăng tamo châi, ôh tá xo liăn a mâu pơlê cheăm kơpong hơngế hơngo, kơpong kơtiê xahpá. Tâi tâng yă liăn ki mơhnŏng kum mê lối 10 rơtal liăn.

Nâ H’Giang Niê, Kăn pơkuâ hnê ngăn Đoân Droh rơtăm kong pơlê Dak Lak tối:

“Pakĭng tơdroăng tơkŭm po krê tung tơrêm tơdroăng cheăng mê pơla mâu khu râ Đoân ối ai tơdroăng tơrŭm dêi pó. Ƀă khu râ kong pơlê mê ngin hiăng mơhnhôk hên hdroh tơdroăng ki thế mâu kŏng ti, khu grup mơhnhôk thế khu kố lăm troh vâ tŏng kum ăm mâu pơlê cheăm a kopong Tây Nguyên. Xua mê, mâu tơdroăng cheăng châ pêi pro tro tơdroăng xiâm, ki păng ‘nâng, tơkŭm tung mơjiâng thôn pơlê nếo, kơphô̆ hloh hlê rơê plĕng. Mâu tơdroăng ki tơkŭm hơ’lêh vâ pêi pro mâu tơdroăng cheăng ai pơxúa hên tâ”.

A kong pơlê Kon Tum, pơtối mơdêk hnoăng cheăng xiâm dêi tơnêi têa, mơhnŏng pleăng hnoăng cheăng, tơdroăng cheăng ki hloh rơkê dêi mâu vâi droh rơtăm, sap apoăng hơnăm troh nôkố, khu rơxông nếo a kong pơlê hiăng kơhnâ khât tung rak vế, pêi pro mâu tơdroăng cheăng, veăng kum pêi pro klêi hnoăng cheăng kal kí, hnoăng cheăng ki xiâm ƀă veăng mơnhông mơdêk pêi cheăng kâ-rêh ối pơlê pơla. Ngoh A Xây, Kăn phŏ pơkuâ hnê ngăn ngăn Đoân Droh rơtăm kong pơlê Kon Tum tối ăm ‘nâi:

“Vâ pơkâ pêi pro châ tơƀrê má môi, Khu Kăn pơkuâ hnê ngăn Đoân Droh rơtăm kong pơlê Kon Tum hiăng mơnhên ngăn, pêi pro tâi tâng mâu hnoăng cheăng xiâm vâ pơkâ pêi pro tung khế 3, cho Khế droh rơtăm. Hnê pơtâp mâu túa cheăng, ki xiâm ai tơdjâk troh hơ’lêh kơxô̆ vâ hnê tối ‘na khoa hok, kih thuât ăm đoân viên droh rơtăm ƀă khu rơhêng vâ tối cho vâ hnê mơhno ăm kơpong hơngế, kơpong hơngo, pơlê cheăm dêi hdroâng kuăn ngo’’.

Khu pơkuâ hnê ngăn Đoân Droh rơtăm kong pơlê Gia Lai  nếo tơkŭm po tơdroăng mơgêi 3 hơnăm mơjiâng ƀă po rơdâ mâu ngế ki rơkê kơhnâ tung hnoăng cheăng Đoân Droh rơtăm ƀă tơdroăng cheăng droh rơtăm kong pơlê Gia Lai ƀă hnối hâk kơdeăn Khu vâi droh rơtăm ki hloh hlê rơkê plĕng pêi pro tiô rơkong Pôa Hồ hnê hơnăm 2023. Tung 3 hơnăm hdrối mê hía nah, mâu râ Đoân, khu râ tung kong pơlê Gia Lai hiăng tŏng kum, thăm mơdêk mâu troăng hơlâ hnê mơhno hnoăng cheăng kăch măng, hiâm tuăn mơjo pâ tơnêi têa, hnê tối ‘na tuăn mơno, tơdroăng rêh ối tiô túa lĕm tro ăm khu droh rơtăm ƀă vâi hdrêng phô̆m vâ xông kân.

Khu pơkuâ ngăn Đoân Droh rơtăm kong pơlê Gia Lai hiăng pơkâ pêi pro “Rêm hâi môi tơdroăng ki tro, rêm măng tĭng môi tơdroăng hơ’muăn ki lĕm’’ a trang Facebook, rĕng teăm hlo ƀă hâk kơdeăn 27 ngế ki rơkê pêi cheăng rơkê tung đoân viên droh rơtăm.

Rak vế, pêi pro Tơdroăng pơkâ kơxô̆ 05 ‘na ‘’Thăm mơdêk hriâm tâp ƀă pêi pro tiô tuăn mơno, hiâm mơno, túa cheăng Hồ Chí Minh’’, Khu pơkuâ hnê ngăn ‘na Đoân Droh rơtăm kong pơlê Gia Lai hiăng pêi pro kơhnâ khât tung tơdroăng hriaam tâp ƀă pêi pro tiô hiâm mơno, tuăn hiâm, túa cheăng Hồ Chí Minh, ngăn kố cho hnoăng cheăng ki xiâm, pêi pro plâ tung rêm tơdroăng cheăng dêi Khu pơkuâ ngăn Đoân.

Ing tơdroăng ki pơkâ pêi pro mê, hiăng hlo ai hên ngế ki djâ troăng ahdrối tung rak vế, pêi pro mâu tơdroăng cheăng ki rơkê, tơkâ luâ mâu tơdroăng ki pá puât, kring vế tơniăn tơdroăng cheăng kal kí, xua ing tơdroăng ki tơniăn dêi kuăn pơlê, mơjiâng thôn pơlê nếo. Kơdo mơ-eăm tung la ngiâ, pin pơtối mơdêk pêi pro mâu tơdroăng cheăng tơ’noăng pâ nhoăm tơnêi têa, pơkâ pêi mâu tơdroăng ki veăng mơnhông pêi cheăng kâ-rêh ối pơlê pơla.

Cho môi tung mâu ngế ki pêi pro châ hâk kơdeăn tung Khu vâi droh rơtăm ki rơkê kơhnâ pêi pro tiô rơkong Pôa Hồ hnê ƀă hnối tơdah xo Ƀâng kơdeăn khĕn dêi Vi ƀan hnê ngăn kong pơlê Gia Lai, ngoh Nay Wing, Kăn pơkuâ hnê ngăn Đoân Droh rơtăm tơring Čư̆ Sê ai tối tiah kố:

‘’Hâi kố, á hâk tơngăm ‘nâng, tung la ngiâ kố ah á kô ai mâu tơdroăng cheăng ki xiâm, vêh mơnhên vâ pêi pro tâi tâng mâu tơdroăng cheăng troh a tơrêm đoân viên droh rơtăm vâ pơtối mơnhông hnoăng cheăng ki kân tâ. Á cho ngế ki djâ troăng ahdrối, pêi pro tro hnoăng tung tơrêm tơdroăng cheăng vâ pro troăng ăm mâu đoân viên droh rơtăm. Thăm mơdêk tơdroăng hnê tối, mơhnhôk khu đoân viên droh rơtăm ‘na mâu tơdroăng ki mơhno tối ‘na luât, rak vế tơniăn ‘na troăng prôk, tŏng kum vâ khu droh rơtăm châ pơtối mung liăn ing hngêi rak liăn, tŏng kum ‘na tơdroăng ki ai cheăng pêi ai pơxúa, thăm mơdêk tơdroăng pêi lo liăn ngân vâ kring vế tơniăn ăm tơdroăng rêh kâ ối’’.

Mơnhên mâu tơdroăng ki veăng kum dêi khu rơxông nếo a pơlê cheăm, Kăn hnê ngăn Vi ƀan kong pơlê Gia Lai hiăng diâp Ƀâng kơdeăn khĕn ăm 6 khu ƀă mơngế krê ki ai hnoăng cheăng rơkê kơhnâ tung tơdroăng mơjiâng ƀă po rơdâ tơdroăng ki vâ rế rơkê kơhnâ tâ tung hnoăng cheăng Đoân ƀă tơdroăng cheăng dêi khu droh rơtăm, vâi hdrêng kong pơlê Gia Lai. Khu pơkuâ ngăn Đoân droh rơtăm kong pơlê Gia Lai xuân hiăng diâp Ƀâng kơdeăn 75 ngế droh rơtăm ki rơkê kơhnâ rak vế, pêi pro tiô rơkong Pôa Hồ hơnăm hơnăm 2023.