VOV4.Xơ Đăng - Kơxo lơ 19/9, Khu râ kăn séa ngăn kơxô̆ 4 dêi Khu xiâm hnê mơhno hbrâ mơdât kâ kơhveăm liăn ngân, xua Đăi tươ̆ng Tô Lâm – Kăn cheăng tung Khu xiâm kal kí, Ngế xiâm pơkuâ Kŏng an, Kăn phŏ hnê mơhno, pơkuâ djâ khu râ kăn hiăng ai roh pêi cheăng ƀă khu pơkuâ tơdroăng cheăng Đảng kong pơlê Gia Lai vâ tơbleăng tơdroăng séa ngăn tơdroăng hbrâ mơdât kâ kơhveăm liăn ngân, tơdroăng ki ôh tá lĕm tro a kong pơlê.

Khu xiâm hnê mơhno hbrâ mơdât kâ kơhveăm liăn ngân tơbleăng tơdroăng séa ngăn a Gia Lai

Mơgêi roh pêi cheăng, Đăi tươ̆ng Tô Lâm pơkâ thế, Khu pơkuâ cheăng Đảng kong pơlê Gia Lai pơtối pơkuâ, hnê mơhno vâ mơdêk hlê plĕng, hnoăng cheăng dêi khu râ kăn pơkuâ hnê ngăn cheăng Đảng, khu râ kăn pơkuâ tung tơdroăng châ hlo, tơdah, tơleăng mâu tơdroăng săm tối, tơdroăng tơbleăng, pơkâ thế săm tối mâu roh tơdroăng ai pro xôi ‘na kâ kơhveăm liăn ngân, tơdroăng cheăng kâ, tơdroăng ki ôh tá lĕm.

Đăi tươ̆ng Tô Lâm pơkâ thế kong pơlê Gia Lai kal tơmâng, tơtrŏng tâ mê nếo tung tơdroăng pơkuâ, hnê mơhno mâu kơ koan cheăng châ hlo rĕng mâu tơdroăng ‘na mơngế pro xôi tung kơvâ pơkuâ tơnêi tơníu, kế tơmeăm khoăng, rak vế kong, pơxâu phak kơtăng mâu ngế krê, khu pú hên pro xôi, tơdrêng amê tơdjâk vâ kheăn hôu, pơchân, hbrâ mơdât mâu ngế xôi tung kong pơlê.

A Sa Ly tơplôu ƀă tơbleăng