Xông tơpui a hneăng hôp, pôa Tô Lâm, Kăn xiâm pơkuâ hnê ngăn Đảng tối nhên ki xiâm dêi roh séa ngăn vâ mơnhên tâi tâng tơdroăng khu râ kăn pơkuâ, hnê mơhno hriăn plĕng, hriâm tâp, hlê plĕng pêi pro, pơtâng tối ƀă tơkŭm po rơdêi pêi pro Tơdroăng pơkâ Hneăng hôp má XIV dêi Đảng rơtế mâu pơkâ, tơdroăng pơkâ dêi Khu xiâm kal kí tơdjâk. Klêi séa ngăn, khu râ kăn pêi cheăng kô châ hlo mâu tơdroăng pêi nếo, tơmiêt pêi rơkê, châ tơƀrê, tơdrêng amê mơgêi mâu túa ki rơkê tơtro tung tơdroăng tơkŭm po a pêi pro a Đảng ƀô̆ pơlê kong kân Hà Nội; mơnhên ôh tá tơdjâk pakong mâu tơdroăng ki lĕm tro, mâu tơdroăng ki tá hâi tro dêi Khu pơkuâ tơdroăng cheăng Đảng pơlê kong kân a mâu tơdroăng xiâm châ mơnhên ngăn.

Pôa Tô Lâm, Kăn xiâm pơkuâ hnê ngăn Đảng pơkâ mâu ngế pêi cheăng tung khu râ kăn mơnhên ngăn mơnhông hiêm mơno pôu râng hnoăng cheăng, pêi kơtăng tơdroăng ki xing xoăng dêi khu râ kăn pơkuâ, hbrâ séa ngăn, mơnhên ngăn, hriăn plĕng hô sơ, mơ-éa ki tơdjâk vâ tơniăn dâi lĕm, tơdroăng roh séa ngăn tiô pơkâ mơ’no.