VOV4.Xơ Đăng - Kơxo lơ 14/10 a Hà Nội, Khu xiâm kal kí, Khu pơkuâ hnê ngăn cheăng Đảng kô tơkŭm po hneăng hôp hlê plĕng tâi tâng ƀă po rơdâ pêi pro Pơkâ dêi Khu xiâm kal kí ‘na troăng mơnhông mơdêk cheăng kâ – rêh ối pơlê pơla ƀă rak tơniăn cheăng lêng gâk kring kơpong Tây Nguyên troh hơnăm 2030 pơkâ pêi troh hơnăm 2045. Pôa Nguyễn Phú Trọng pơkuâ ƀă ai ƀai xông tơpui hnê mơhno a hneăng hôp.

Khu xiâm kal kí, Khu pơkuâ hnê ngăn Đảng tơkŭm po Hneăng hôp mơnhông mơdêk cheăng kâ – rêh ối pơlê pơla, gâk kring cheăng lêng kơpong peăng tơdế kong ngo peăng Kơnhŏng tơnêi têa troh hơnăm 2030, tơmiât pêi troh hơnăm 2045

Nếo achê kố, troh pơkuâ ƀă xông tơpui a hneăng hôp mơgêi pêi pro Pơkâ kơxô̆ 10 ƀă Mơgêi kơxô̆ 12 dêi Khu xiâm kal kí ‘na mơdêk cheăng kâ – rêh ối pơlê pơla ƀă rak tơniăn gâk kring kơpong Tây Nguyên, pôa Phạm Minh Chính, Ngế pro xiâm hnê ngăn tơnêi têa hiăng tối nhên mâu ƀai hriâm ki rơkê kal môi tiah kal hlê plĕng tro ƀă tŭm ‘na hnoăng, tíu pêi cheăng ƀă ki kal dêi kơpong ƀă lâp tơnêi têa a tâi tâng mâu râ, mâu kơvâ cheăng; tối nhên hnoăng, tíu pêi cheăng ki kal dêi kơpong Tây Nguyên thế tơkŭm ƀă hlối tơleăng tơdâng tá ‘na kal kí, troăng tơmiât, cheăng kâ, rêh ối pơlê pơla, kong prâi, cheăng lêng, gâk kring; hlối mơnhông cheăng kâ ƀă rak ngăn tơleăng mâu tơdroăng pơlê pơla, troăng hơlâ hdroâng kuăn ngo, loi tĭng tiô khôp; pêi pro tơdroăng ki phiu ro, pro ki kơnâ tơdroăng ton nah, khôi túa lĕm tro, khôi túa kăch măng, tơdroăng khŏm mơ-eăm, pói vâ mơ-eăm, mơ-eăm xêh, tơrŭm môi tuăn chiâng tơdroăng ki mơnhông mơdêk; thế ai troăng pơkâ pêi, troăng hơlâ mơhnhôk rơdêi, ki má lối cho tơrŭm pơla tơnêi têa ƀă mơngế krê ƀă mơ’no liăn cheăng xo kơxô̆ liăn ing kong têa ê.

VOV/Tơplôu: A Sa Ly