Hâi lơ 6/6, Khu pêi cheăng kơxô̆ 3 dêi Khu xiâm ngăn hnê hriâm ƀă hnê mơjiâng tuăn ngôa rơkê xua jâ Ngô Thị Minh - Ngế xiâm phŏ  ngăn hnê hriâm, Kăn phŏ pơkuâ Khu hnê mơhno cheăng râ tơnêi têa Hneăng tơ’noăng mơgêi hriâm râ má pái phôh thong hơnăm 2023 pro ngế xiâm pơkuâ khu hiăng lăm séa ngăn tơdroăng hbrâ hneăng tơ’noăng mơgêi hriâm râ má pái a kong pơlê Kon Tum. 

Tối tơbleăng a rôh pêi cheăng ƀă Khu hnê mơhno hneăng tơ’noăng mơgêi hriâm râ má pái hơnăm 2023 kong pơlê Kon Tum, jâ Ngô Thị Minh, Ngế Phŏ  ngăn hnê hriâm ƀă hnê mơjiâng tuăn ngôa rơkê pâ thế pôi tá tơngôu; tung tơdroăng hriâm Luât pơkâ tơ’noăng thế pơ’lêh  nếo troăng rơhlâ vâ mơngế ki hriâm ngăn tơ’noăng hlê tŭm luât pơkâ pêi pro tro hnoăng cheăng dêi tơná.

Klêi mê, hbrâ tơdroăng tơná hlê ki hiăng hriâm, túa cheăng vâ mơngế ki pêi hnoăng cheăng ngăn a hneăng tơ’noăng hbrâ rơnáu ƀă mâu tơdroăng lơ trâm; pơkâ séa ngăn dêi Khu hnê mơhno hneăng tơ’noăng thế châ chêh mơjiâng nhên khât. Hneăng tơ’noăng mơgêi hriâm râ má pái phôh thong hơnăm 2023, kong pơlê Kon Tum ai 5.028 ngế hok tro, tung mê ai 1.722 ngế kuăn ngo.