Kơxê hâi lơ 5/6, jâ Ngô Thị Minh, Ngế xiâm phŏ ngăn hnê hriâm ƀă hnê mơjiâng tuăn ngôa rơkê - Kăn phŏ Pơkuâ hnê mơhno râ Tơnêi têa hneăng tơ’noăng mơgêi hriâm râ má pái phôh thong hơnăm 2023 tơdrêng ƀă mâu ngế tung khu pêi cheăng kơxô̆ 3 hiăng pêi cheăng ƀă kong pơlê Gia Lai ‘na tơdroăng hbrâ hneăng tơ’noăng mơgêi hriâm râ má pái phôh thong hơnăm 2023.

Hneăng tơ’noăng mơgêi hriâm râ má pái phôh thong hơnăm 2023, kong pơlê Gia Lai ai lối 14.800 ngế hok tro chêh inâi tơ’noăng, tung mê ai lối 3.100 ngế hok tro kuăn ngo. Kong pơlê mơhnhôk dâng 23 rơpâu ngế kăn ƀô̆ pêi hnoăng cheăng ngăn tơ’noăng a 41 tíu tơ’noăng a 17 tơring, pơlê krâm, pơlê kong kơdrâm.

Tối tơbleăng a rôh pêi cheăng, jâ Ngô Thị Minh, Ngế xiâm ngăn ‘na hnê hriâm ƀă hnê mơjiâng tuăn ngôa rơkê pơkâ thế mâu tíu pêi cheăng tơdjâk troh thế pơtối pêi kơtăng mâu pơkâ dêi khu xiâm ngăn hnê hriâm ƀă hnê mơjiâng tuăn ngôa rơkê ‘na tơdroăng cheăng ngăn tơ’noăng; séa ngăn nếo a mâu tơdroăng hbrâ vâ châ ‘nâi ƀă rĕng ‘mâi rơnêu teăm tơkâ luâ mâu tơdroăng xía vâ tâng lơ trâm.