Mâu tơdroăng chêh tối tơbleăng a rôh hôp tơpui tơno ai tối, tung 80 hơnăm mơjiâng, tơplâ, plâ ƀlêi trâng a ƀă mơnhông tơƀrê, Khu xiâm ngăn tơdroăng Kal kí ôh tá la lâi pơtê đi đo mơ-eăm mơnhông rế rơdêi, pê klêi mâu hnoăng cheăng ki châ pơcháu; hnê mơhno pêi trâu rơdâ, teăm tơdrêng, pêi tơƀrê tơdroăng mơjiâng kơ koan kal kí tâi tâng mâu lêng rơdêi tung tŭm tơdroăng, veăng ‘no hnoăng mơdêk tơƀrê hnoăng pơkuâ dêi Đảng ƀă mâu lêng.

Mâu tơdroăng chêh tối xuân  mơhno, tung pơla nôkố, tơdroăng kring vế Tơnêi têa mơjiâng Khu lêng ai pơkâ rế kân tâ ƀă Khu xiâm ngăn tơdroăng kal kí bă kơ koan kal kí rêm râ tung tâi tâng mâu lêng. Pơtối rak vế pêi pro tiô tơdroăng ton nah ‘’môi tuăn - khên tơnôu; djâ troăng a hdrối - kơhnâ rơkê’’, Khu xiâm ngăn tơdroăng Kal kí pơtối rak ki kơdôu mơ-eăm kơhnâ, hbrâ tăng ‘nâi plĕng, tơkŭm tơbleăng pêi tơbrê mâu pơkâ, troăng hơlâ, mơhno, hnê pêi ‘na tơdroăng kring vế tơnêi têa ƀă mơjiâng Khu lêng tung tơdroăng rêh ối nếo nôkố.