VOV4.Xơ Đăng - Tối tơbleăng tiô hlá mơ-éa tâk GDP xơpá khât, malối tung pái khế sap khế môi chât troh môi chât péa, drêng tơdroăng pơ’lêh tung lâp plâi tơnêi pơ’lêh tơ ê. Hlo ti mê, Khu xiâm ngăn tơdroăng pơkâ ƀă ‘no liăn cheăng xuân tơbleăng péa tơdroăng: Tâng tâk iâ xua trâm hên xơpá mê tung hơnăm 2022, ki tâk GDP kô dâng 7,5%. Tâng tung pơla tŭm tơdroăng môi tiah nôkố, ôh tá kơdrâ klâi ƀă tơdroăng cheăng kâ tung tơnêi têa pin ing pa kong mê tiô tối hdrối GDP tâk dâng 8%.

‘Na ki tơngah cheăng kâ Việt Nam hơnăm 2023, Khu xiâm ngăn tơdroăng pơkâ ƀă ‘no liăn cheăng tối tơdroăng mê xuân hơkăng, tơ’lêi ƀă xơpá tơvât ƀă, la xơpá hên tâ. Tơdroăng liăn ôh tá ai yă ƀă ki tâk cheăng kâ lâp plâi tơnêi hơnăm 2023 pá vâ ’nâi hdrối, Việt Nam kal ai mâu pơkâ séa ngăn tro mê ki tâk tơniăn, tâng ôh tá kâi mơdât mê kô pá vâ tối tơbleăng hdrối.

Tơdroăng ăm mung liăn mơjiâng tơmeăm khoăng tơnêi têa, Ngế xiâm phŏ ngăn ‘na tơdroăng pơkâ ‘no liăn cheăng ăm ‘nâi, châ 46.7% tâng vâ pơchông ƀă pơkâ dêi Ngế pro xiâm hnê ngăn tơnêi têa pơcháu. Mơhé iâ tâ tâng vâ pơchông ƀă hơnăm nah, la kơxô̆ ki tối hên tâ hơnăm hdrối vâ chê 35 rơpâu rơtal liăn. Ki xiâm cho xua tâi tâng liăn ‘no mơjiâng tơmeăm khoăng tơnêi têa hơnăm 2022 hên tâ hơnăm 2021.

VOV Tây Nguyên/Tơplôu: Gương