Kơxê lơ 4/7, a Hà Nội, Thươ̆ng tươ̆ng Lương Tam Quang, Ngế xiâm phŏ pơkuâ Kŏng an tơdah pôa Jean-Christophe Peaucelle, ngế kum cheăng mâu tơdroăng loi tĭng tiô khôp, Khu xiâm châu Âu ƀă Ngế tơpui kâ ƀă kong têa ê Kŏng hoa Pơhlăng. A roh trâm mâ, pôa Lương Tam Quang, Ngế xiâm phŏ  pơkuâ Kŏng an mơnhên, Đảng, Tơnêi têa Việt Nam đi đo nhuô̆m hnoăng tơ’lêi hlâu loi tĭng tiô khôp dêi rêm ngế kuăn pơlê, mơhno tơdroăng môi tuăn sap apoăng troh tá tui lui, đi đo tung troăng pơkâ pêi, troăng hơlâ ƀă châ pêi tiô luât.

Mâu tơdroăng loi tĭng tiô khôp pơrá tơdâng a ngiâ luât, rêh ối tơtro, rŭm môi tuăn, achê rơtế ƀă hdroâng kuăn ngo, ôh tá tơhôu pơla hdroâng mơngế, tơhôu tung tơdroăng loi tĭng tiô khôp.

Pôa Lương Tam Quang pói vâ Kăn teăng mê kô cho kông tơdjêp mơnhông tơrŭm cheăng ton xŏn pơla Việt Nam – Pơhlăng mơnhông mơdêk rế trâu hơngế tâ tung tâi tâng mâu kơvâ cheăng, ki rơhêng vâ tối cho mâu tơdroăng pêi cheăng tơrŭm cheăng lâp plâi tơnêi tung tơdroăng loi tĭng, tiô khôp, xuân môi tiah kum thăm mơdêk tơdroăng tơrŭm cheăng, tơpui tơno túa ki rơkê tung pêi cheăng pơla Khu xiâm pơkuâ Kŏng an Việt Nam ƀă mâu kơ koan pêi pro luât dêi Pơhlăng kum gâk kring tơnêi têa, tơniăn pơlê pơla, tơ’lêi hlâu loi tĭng tiô khôp a rêm kong têa.