Khu lăm pêi cheăng dêi Khu xâm pơkuâ ngăn lêng kong pơlê Dak Lak hiăng troh lăm ngăn tơdroăng hbrâ tâ phĭu ƀă hneăng pêi cheăng hbrâ tơplâ a Trung đoân Bộ binh 888, Trung đoân 584 ƀă hên cheăm bêng ki xiâm môi tiah cheăm Ea Kar, cheăm Ea Ô, bêng Buôn Hồ.

Khu kăn hiăng lăm ngăn tơdroăng hbrâ rơnáu rơnuâ pro, pro tíu tâ, veăng tâ phĭu vâ pơxúa ăm hâi tâ phĭu rah xo kăn Kuô̆k hô̆i hneăng 16 ƀă mâu kăn Hô̆i đong kuăn pơlê rêm râ, hneăng 2026-2031. Mâu kăn lăm pêi cheăng khê̆n kơdeăn ki hbrâ dêi mâu tíu pêi cheăng tung tơdroăng hnê pêi pro, tơbleăng pêi kơtăng mâu pơkâ, ‘na tơdroăng tâ phĭu; tơkŭm hnê tối, hnê ăm mâu kăn ƀô̆, mâu lêng ‘nâi plĕng ki ai pơxúa, ki kal dêi hneăng tâ phĭu rah xo kăn, tơniăn tro pơkâ, kuăn pơlê môi tuăn ƀă tơniăn.