Khu xiâm tơpui kâ hâi lơ 28/10 tơkŭm po rôh tơbleăng Pơkâ dêi Khu xiâm tơpui kâ ‘na tơdroăng ki mơjiâng ƀă pơkâ Túa pơkâ pêi cheăng dêi Khu hnê mơhno cheăng dêi Khu xiâm tơpui kâ ‘na hnoăng cheăng tŏng kum kuăn pơlê Việt Nam a kong têa ê, tơdrêng a mê hlối tơkŭm po rôh hôp Khu hnê mơhno cheăng rôh má môi.

Pôa Phạm Quang Hiệu, ngế xiâm phŏ tơpui kâ tơpui a rôh tơbleăng

Tơpui a rôh hôp, pôa Phạm Quang Hiệu tối nhên, Khu pơkuâ hnê ngăn Đảng, Kăn pơkuâ Khu xiâm tơpui kâ mơnhên hnoăng cheăng tŏng kum kuăn pơlê cho môi hnoăng cheăng kal kí dêi Khu xiâm tơpui kâ, châ pêi pro đi đo ƀă rơhêng vâ hnoăng cheăng kố rế hía rế pêi pro teăm tơdrêng, tơƀrê tâ, rak vế tơniăn tơdroăng ki hlê plĕng ƀă tơrŭm tơtro pơla tung tơnêi têa ƀă kong têa ê. Tơdroăng ki mơjiâng ƀă pêi cheăng dêi Khu hnê mơhno kô mơdêk ki rơkê plĕng, rơkê dêi hnoăng cheăng tŏng kum kuăn pơlê tung la ngiâ.