VOV4.Xơ Đăng - A rôh hôp tơbleăng ‘na tơdroăng cheăng kâ rêh ối pơlê pơla sap ing khế 4 troh khế 6 hơnăm 2022 xua Vi ƀan hnê ngăn kong pơlê Ninh Thuận tơkŭm po a kơxê lơ 14/7, teăng mâ Khu ngăn troăng prôk ƀă rơxế kơtâu hiăng tơbleăng tơdroăng ki tơkêa ‘mâi mơnhông troăng rơxế lơ treng Tháp Chàm – Đà Lạt. Troăng rơxế lơ treng pơxiâm ăm kơtâu sap ing hơnăm 1932 ƀă tro pơtê sap ing hơnăm 1972. Tơdroăng tơkêa kố xŏn dâng 83,5km, tung mê, tíu ki tơkâ luâ kong pơlê Ninh thuận 49 km, ƀă tâi tâng ai 17 to tơraih ƀă tíu ki xo tơmối.

Pakĭng mê, ai 64 to kông, 5 to klôh ƀă 16 km krâ ‘măn troăng meăm. Vâ pêi pro tơdroăng tơkêa kố, tiô tối hdrối kô gu pro tơbăng mâu troăng ki tơkâ luâ Ninh Thuận dâng 130ha, ki hên cho tơnêi pêi chiâk deăng. Tai tâng kơxô̆ liăn ‘no ăm tơdroăng tơkêa kố dâng 27.780 rơtal liăn. Tiô tối hdrối troăng rơxế lơtreng kố kô châ tơbleăng pro sap ing hơnăm 2024 ƀă kô klêi ƀă ăm xúa sap ing hơnăm 2030.

Katarina Nga tơplôu ƀă tơbleăng