Tiô rơkong krếo dêi jâ Naly Sisoullith, Kơdrâi dêi pôa Thongloun Sisoulith, Kăn xiâm pơkuâ hnê ngăn Đảng, Kăn xiâm hnê ngăn kong têa Lếo, jâ Ngô Phương Ly, Kơdrâi dêi pôa Tô Lâm, Kăn xiâm pơkuâ hnê ngăn Đảng hiăng lăm pôu Lếo ƀă veăng Hôp tơpui tơno ‘na Pơchoh chêp hmân ếo tiô khôi vâi krâ nah ASEAN roh má 9 ƀă dó inâi ‘’Thăm krá tơniăn tơrŭm Pơlê pơla ASEAN ing tơmeăm kơnía khôi túa lĕm ƀă pơchoh chêp hmân ếo’’ sap ing hâi lơ 3/11 troh hâi lơ 6/11/2024.

Tơpui tơno ƀă mâu kăn teăng mâ veăng Hôp tơpui tơno, jâ Ngô Phương Ly, Kơdrâi Kăn xiâm pơkuâ hnê ngăn Đảng kheăn kơdeăn tơdroăng ki kơnâ dêi Hôp tơpui tơno Pơchoh chêp hmân ếo tiô khôi vâi krâ nah ASEAN roh má 9 xuân môi tiah tơdroăng ki lĕm, tơdroăng ki má môi dêi mâu tơmeăm châ mơđah tơbleăng a Hôp tơpui tơno roh kố.

Kơdrâi Kăn xiâm pơkuâ hnê ngăn Đảng rơkâu Lếo drêng pôu râng hnoăng Kăn xiâm hnê ngăn ASEAN hiăng tơkŭm po châ tơƀrê mâu tơdroăng pêi, ki rơhêng vâ tối cho mâu Hneăng hôp khu râ kăn xiâm dêi ASEAN, mơnhên tơdroăng tơkŭm po châ tơƀrê Hôp tơpui tơno ‘na Pơchoh chêp hmân ếo tiô khôi vâi krâ nah kô kum tung tơdroăng châ tơƀrê dêi hơnăm Kăn xiâm hnê ngăn ASEAN, pro tơ’lêi hlâu trâm mâ, tơrŭm pơla kuăn pơlê mâu kong têa ASEAN, tơdrêng amê mơnhông ƀă rak kơvâ pơchoh chêp hmân ếo tiô khôi vâi krâ nah dêi mâu kong têa.