Rôh kong mêi têa lân lu mơnui khế 11/2025 a kong pơlê Khánh Hòa hiăng pro lŭp lối 6.000 rơtal liăn, pro 22 ngế hlâ, 20 ngế tro rong ƀă hrĭng rơpâu rơpŏng kuăn pơlê tro tơdjâk. Pôa Nguyễn Hồng Trường, Ngế pơkuâ pơtâng tối ‘na hyôh kong prâi Khánh Hòa, ăm ‘nâi tơdroăng kong prâi rế ôh tá tơniăn. A kroăng Cái Nha Trang, mơhé hâi luâ ki lân lu ó dêi têa pá kơnhŏng, la pá xôp ăm ‘nâi têa hiăng tâk đik ó. Ki xiâm xua kong mêi kân hlối tơkŭm tung pơla pơ’lêh kơphô̆ pro rế kŭn troăng têa hiu, kơdroh ki vâ ăm têa châ hiu lo. Tơnêi tíu, têa kroăng, rơnâk, tơbăng kŭn xuân pro têa lu rĕng tâk đik, rĕng xiâ, la ki xía vâ rế hên.

“Ngin dế tơbleăng hdró tơrêng tíu tro têa lu a mâu kơpong ki tro têa lu trâu. Xuân môi tiah hngêi á cho môi tíu hdró mơhno têa lu ƀă kơ koan ai vâ chê 20 rơpŏng kăn ƀô̆, mâu ngế pơkuâ cheăng, mâu ki pêi cheăng ai hngêi tro têa lu sap 1 troh  vâ chê 2 met, mê cho mâu tíu hdró mơhno têa lu. Ing mê, tíu mơjiâng pro kơchuâ lơ gât têa lu, pro ăm hlo ki xiâm vâ tăng ‘nâi plĕng tơbleăng ăm Vi ƀan kuăn pơlê dêi kong pơlê mơjiâng pơkâ, mơdêk ki tơbrê tung tơdroăng hbrâ mơdât xía vâ xua kong prâi pro tung la ngiâ”.

Ing tơdroăng ki ai khât tơbleăng tơdroăng hbrâ ví rôh kong mêi têa lân lu a mơ’nui hơnăm nah, Thiếu tướng Nguyễn Túy, Ngế xiâm Pơkuâ lêng kong pơlê Khánh Hòa, mơhno mâu tơdroăng ki pá, tơvâ tơvân kal tơkâ luâ: Tơdroăng tăng ‘nâi plĕng mâu mâu tíu hâi teăm tro nhên, ki tơrŭm pơla mâu lêng ối tơvâ tơvân, troăng hơlâ pêi pro “4 tơdroăng a tíu mê” hâi pơtối pêi tro teăm tơdrêng, ƀă tơdroăng ki vâ tối ăm ‘nâi pro pơxúa ăm tơdroăng hnê mơhno pêi pro ối ai rôh pơtê.

Thiê̆u tươ̆ng Nguyễn Túy, pơkâ thế kal mơjiâng tơdrêng lơgât kơchuâ chêh tíu têa lu vâ ai luât hbrâ pêi pro nhên tăng ngăn kơpong kuăn pơlê ối, xĕn kuăn pơlê ki ối a tíu rơ-iô lăm ối a kơpong tơniăn; hbrâ mâu tơmeăm, rơxế, plong, hnê hriâm, pơtâp ƀă mơdêk hlê plĕng tung tơrŭm cheăng pêi pơla mâu lêng lăm tŏng gum..

“Khu pơkuâ cheăng Hbrâ ví xía vâ dêi kong pơlê hnê mơhno mâu cheăm bêng, tíu pêi cheăng pơtối tăng ngăn a kơpong kuăn pơlê ối, tíu pêi cheăng kơ koan, tíu pêi cheăng, đông lêng; khŏm xĕn, djâ mâu ki ối a tíu ôh tá tơniăn lăm ối tíu tơniăn, hbrâ rơxế, tơmeăm khoăng lo ing kơpong rơ-iô. Pakĭng mê, tăng ‘nâi plĕng Vi ƀan Kuăn pơlê dêi kong pơlê mơjiâng mâu tơdroăng tơkêa bro mơnhông ôm cheăng kâ - pơlê pơla hyô hlối ai pơxúa, tơtro ƀă kong, ƀă pơlê cheăm, kong pơlê  vâ pêi tơdroăng hbrâ mơdât, xía vâ kong prâi pro ôh tá tơniăn ƀă tŏng xo mâu ngế hliăng tiâ”.

Pôa Trần Phong, Kăn hnê ngăn Vi ƀan Kuăn pơlê kong pơlê Khánh Hòa tối tiah kố, thế ngăn nhên tơdroăng hbrâ mơdât xía vâ kong prâi pro ôh tá tơniăn tiô tơdroăng hbrâ pêi, ton hơnăm. Tơdrêng ƀă tơdroăng séa ngăn mâu kơpong ki rơ-iô tâ, cheăm kal thế pê klêi tơdroăng pơkâ hbrâ ví xiá vâ kong prâi pro, mơdêk ivá hnê mơhno, pơkuâ ƀă mơdêk xúa khoa hok - kŏng ngê̆ tung tơdroăng séa ngăn,  tối hdrối, tơbleăng ăm ‘nâi ‘na kong prâi.

“Thế rĕng séa ngăn,‘mâi hơ’lêh, pêi klêi Pơkâ hbrâ mơdât xía vâ kong prâi pro ôh tá tơniăn pơla hơnăm 2026-2030; tă ngăn tŭm mâu troăng vâ hbrâ ví tiô kơ râ ki ôh tá mơhúa, achê ƀă tơrêm kơpong, tơrêm tíu. Pakĭng mê, hlối hnê pêi tơƀrê tơdroăng pơkuâ ngăn hnê mơhno, rĕng pơ’lêh kơxô̆, xúa khoa hok - kŏng ngê̆ tung tơdroăng tăng ngăn, tơbleăng tối hdrối ăm ’nâi ƀă hnê troh a cheăm”.

Ki khât dêi todroăng a Khánh Hòa ăm ‘nâi, tung pơla hyôh kong prâi hơ’lêh, kong prâi ôh tá u ối tiô ton nah. Drêng ki tơniăn đi đo ôh pá ai môi tiah hdrối, mê kơxô̆ ki rak ngăn chêh ‘măn tung kơmăi xup xo, tơdroăng vâ tơbleăng hdrối ƀă ki hbrâ rơnáu ví xía vâ cho ki xiâm vâ pơkâ. Mâu ƀai hriâm ing têa lân lu, tâng châ chôu pâ rak xo pêi pro tro, kô cho xiâm ki vâ cheăm bêng hbrâ rơnáu pêi pro hdrối kong prâi ôh tá tơniăn, vâ kơdroh ki lŭp ƀă tơniăn ăm kuăn pơlê.