Vâ hbrâ rôh lăm tăng, tơkŭm kơxêng kiâ mâu lêng mối đô̆i ki hlâ  tơplâ nah a rơnó tô mơdrăng hơnăm kố, Khu xiâm pơkuâ ngăn lêng kong pơlê Kon Tum hiăng hnê mơhno ăm Đô̆i K53 tăng ngăn, ƀă ‘nâi 43 tơdroăng ‘na tơnâp ‘mé mâu lêng mố đô̆i pin ki hlâ rôh tơplâ a kong têa pú nah. Klêi tí tăng ngăn, ai mâu tơdroăng ăm ‘nâi nhên hên mơngi kô lăm chia rôu tăng vâ tơkŭm kơxêng mâu lêng mố đô̆i ki hlâ rôh tơplâ.

Tơbleăng a rôh leh ăm lêng lăm tăng, jâ Y Ngọc, Kăn xiâm phŏ hnê ngăn Vi ƀan kuăn pơlê kong pơlê Kon Tum pơkâ thế Khu xiâm pơkuâ ngăn lêng kong pơlê Kon Tum mơdêk hnoăng cheăng pơkuâ hnê, mơhno Đô̆i K53 tung pơla pêi hnoăng cheăng; pêi tro tơdroăng hnê hriâm ‘na kal kí tuăn mơno lĕm ăm mâu kăn ƀô̆, mâu lêng mố đô̆i; mơdêk tuăn rơrŭm krá dêi rơpó, pêi cheăng tro hnoăng cheăng pơcháu, rak vế pêi pro tro luât lêng ƀă mâu troăng rơhlâ, tiô tơdroăng pơkâ dêi Đảng, luât dêi pái  tơnêi têa Việt Nam - Lếo- Kul.

Tiô ăm ‘nâi rơnó mơdrăng hơnăm nah, Đô̆i K53 kong pơlê Kon Tum hiăng tơkŭm, djâ vêh kĕn tơnêi têa châ 16 kơxêng kiâ mố đô̆i ƀă mâu kăn ki hlâ rôh tơplâ a Lếo ƀă Kul.