Đảng  ƀô̆ tơring tơkăng kong Sa Thầy, kong pơlê Kon Tum ai 53 tôh tơkŭm cheăng Đảng ƀă lối vâ chê 2.100 ngế đảng viên. Klêi châ Kăn   pơkuâ hnê ngăn Đảng kong pơlê Kon Tum rah xo tơkŭm po hneăng hôp đảng ƀô̆ tơring Sa Thầy hiăng Pơkâ kơxô̆ 208 ‘na hbrâ ƀă tơkŭm po hneăng hôp Đảng rêm râ hneăng hơnăm 2025-2030. Jâ Y Sâm Kăn phŏ hnê ngăn đảng tơring Sa Thầy, ăm ‘nâi, tơring hiăng po lâm hnê tơdroăng cheăng hbrâ hneăng hôp troh tâi tâng kăn ƀô̆ xiâm, hlối mơjiâng Tiểu ban pơkuâ ngăn mơngế cheăng, Tiểu ban chêh mâu Hlá mơ-éa ƀă Tiểu ƀan tơkŭm po hneăng hôp:

"Vâ hbrâ tro tơniăn hneăng hôp, Khu kăn Đảng tơring hnê mơhno mâu kơ koan tíu pêi cheăng malối cho Tiểu ƀan pơkuâ ngăn mơngế cheăng hbrâ tro tơdroăng ‘na rah xo mơngế tro tiô pơkâ, tro tiô troăng hơlâ hnê mơhno dêi tíu xiâm tơnêi têa ‘na tơdroăng pơkuâ ngăn mơngế cheăng. Ƀă hlá  mơ-éa chêh nôkố hiăng hnê mơhno Vi ƀan kuăn pơlê tơring ƀă mâu kơvâ cheăng séa ngăn nếo mâu tơdroăng Pơkâ Hneăng hôp Đảng ƀô̆ hneăng 2020-2025 ƀă mâu tơdroăng cheăng ki kal dêi kong pơlê’’.

Tơdrêng ƀă tơdroăng hbrâ hneăng hôp mơnúa Đảng ƀô̆ tơring, Tơring Sa Thầy hnê mơhno mâu khu tơrŭm cheăng Đảng mơjiâng pơkâ tro tiô hneăng hôp chi ƀô̆, đảng ƀô̆ tro tiô pơkâ, tơdroăng Hnê mơhno kơxô̆ 35 dêi Khu xiâm kal kí.

Ing mê, mâu chi ƀô̆ dêi Đảng ủy cheăm kô hôp klêi hdrối hâi lơ 30/11/2024. Đảng ƀô̆ cheăm Ya Xiêr châ khu kăn pơkuâ hnê ngăn cheăng Đảng Tơring Sa Thầy rah tơkŭm po hôp mơ núa a cheăm tiô tối hdrối tơkŭm po hneăng hôp a hâi lơ 6/1/2025. Pôa Phan Chí Thiện, Kăn hnê ngăn Đảng ủy cheăm Ya Xiêr, ăm ‘nâi, nôkố tâi tâng 13 chi ƀô̆ tung cheăm dế pêi vâ rĕng klêi tơdroăng hbrâ hneăng hôp:

 “Tâi tâng chi ƀô̆ hiăng châ tơkŭm rĕng hnê na troăng hơlâ tơkŭm po hneăng hôp mơnúa a cheăm. Mâu chi ƀô̆ hiăng hbrâ mơjiâng tơdroăng chêh ta tro rôh nôkố tâi tâng tá mâu chi ƀô̆ dế chêh mâu hlá mơ-éa, dế tơmâng xo tơdroăng veăng hnê tối dêi mâu kơ koan tơdjâk troh vâ ai môi tơdroăng tơbleăng tối tơdroăng kal kí, tơdroăng chêh tơhrâ vâ rơnêu tơná ƀă chêh tơtro ƀă tơdroăng ki ai khât. Apoăng khế 10 tâi tâng mâu chi ƀô̆ kô pơtroh troăng hơlâ ‘na tơdroăng pơkuâ mơngế pêi cheăng ăm Peăng Khu kăn Đảng ủy cheăm séa ngăn ƀă ăm veăng hnê tối’’.

Tơdrêng ƀă hbrâ troh rôh po hneăng hôp hneăng ki nếo, mâu khu tơrŭm cheăng Đảng a tơring Sa Thầy, kong pơlê Kon Tum xuân dế mơdêk rơdêi mâu tơdroăng mơhnhôk tơ’noăng pêi pro vâ koh tơbâ hneăng hôp đảng ƀô̆ rêm râ. Séa ngăn, rĕng pê klêi, pê klêi tơƀrê mâu tơdroăng hneăng hôp hdrối ai pơkâ. Pakĭng mê ing tơdroăng pơkâ hlo ai khât mơnhên mâu pơkâ mơhno ăm hneăng cheăng ki nếo.

“Klêi mơgêi hneăng pêi cheăng 2022-2025, tiô pơkâ dêi Đảng ủy cheăm Ia Xiêr, pơtối tơdroăng cheăng hbrâ vâ hôp hneăng ki nếo 2025-2027, tơdrêng amê mâu đảng viên kơhnâ mơhnhôk kuăn pơlê pơhlêh pro kơdrum deăng vâ pêi mâu tơdroăng cheăng tiô pơkâ dêi tơnêi têa ‘na mơnhông cheăng kâ. Vâ hbrâ hneăng hôp 2025-2027, chi ƀô̆ xuân hiăng hôp ‘na tơdroăng mơngế pêi cheăng, tơbleăng rơnêu tơná, troh nôkố vâ tối hiăng pro klêi hlá mơ-éa, tiô tơdroăng tối hdrối a hâi lơ 16/10/2024 chi ƀô̆ Plei O kô tơkŭm po hneăng hôp’’.

Troh nôkố tơring Sa Thầy, kong pơlê Kon Tum hiăng pêi klêi 54/71 tơdroăng pơkâ ki Tơdroăng Pơkâ hneăng hôp Đảng ƀô̆ tơring rôh má 17, hneăng hơnăm 2020-2025 ai pơkâ. Ki tơƀrê cho tơdroăng mơjiâng Đảng, riân rêm hơnăm tơring tơ’mot châ 100 ngế đảng viên nếo, luâ 10% tiô pơkâ. Tâi tâng 64 thôn pơlê ai kăn hnê ngăn cheăng Đảng, chi ƀô̆ hlối pro kăn thôn ‘nâ hlối pro Ngế hnê ngăn ‘na Măt trâ̆n luâ 30% tâng vâ pơchông ƀă tơdroăng pơcháu.

Nôkố Khu pơkuâ hnê ngăn cheăng Đảng tơring Sa Thầy dế pơtối hnê mơhno 53 khu tơrŭm cheăng Đảng a cheăm, bêng tơniăn pêi tro mâu pơkâ, tro tiô pơkâ ƀă pê klêi tơdroăng tơkŭm hneăng hôp hdrối hâi lơ 10/2/2025. Tơdrêng amê hnê mơhno tá khu cheăng kal kí mơ-eăm pêi klêi mâu pơkâ hneăng hdrối ai pơcháu vâ pro xiâm ăm hneăng cheăng ki nếo ƀă mơ-eăm pơtối mơdêk ivá cheăng pơkuâ, ivá tơplâ, mơjiâng Đảng ƀô̆ ƀă khu cheăng kal kí dêi tơring rế krúa lĕm, rơdêi; tơmâng khât troh tơdroăng rêh ối dêi kuăn pơlê rế plâi tơtô, hơniâp ro.