Hneăng tơ’noăng mơgêi hriâm râ má pái phôh thong hơnăm 2023 hiăng vâ chê troh, a kong pơlê Kon Tum vâ pro tơ’lêi hlâu ăm mâu hok tro, mâu kăn ƀă kơvâ cheăng a kong pơlê ai tơdroăng veăng kum, malối ƀă hok tro kuăn ngo. Hneăng tơ’noăng mơgêi hriâm râ má pái phôh thong hơnăm kố, kong pơlê Kon Tum ai tâi tâng 5 rơpâu 28 ngế hok tro, tung mê ai 1 rơpâu 722 ngế hok tro hdroâng kuăn ngo.

Ƀă tơdroăng mơ-eăm ôh tá lôi hok tro ki lâi xua tơdroăng xơpá mê ôh tá veăng tơ’noăng, mâu kăn ƀă kơvâ cheăng kong pơlê Kon Tum hiăng ai hên tơdroăng veăng kum hok tro, sap tơdroăng rơbot ƀai troh mâu hâi vâ lăm tơ’noăng. Nôkố, Khu pơkuâ ngăn Đoân Droh rơtăm Kon Tum hiăng mơjiâng 5 khu pleăng hnoăng tơná vâ kum hok tro tung mâu hâi tơ’noăng, tí tăng ngăn vâ ‘nâi, veăng kum hok tro kơtiê, hok tro ki ối a kơpong hngế hngo, kơpong tíu tơkăng kong; mâu kăn ƀă kơvâ ngăn hnê hriâm ƀă hnê mơjiâng tuăn ngôa rơkê dêi 10 tơring, pơlê kong kơdrâm dêi kong pơlê xuân hiăng tơbleăng tŏng kum hok tro ki xơpá, hok tro kuăn ngo ‘na liăn kâ ôu tung pơla rơbot ƀai tơ’noăng ƀă liăn liăm to rơxế lăm tơ’noăng, tíu kâ ối tung plâ tơ’noăng.