Kơxo lơ 4/1, tơdroăng ăm ‘nâi ing Vi ƀan tơring Tu Mrông, kong pơlê Kon Tum, pôa Võ Trung Mạch , Kăn hnê ngăn Vi ƀan tơring hiăng chêh pơkâ tah lôi hlá mơ-éa mơnhên tơdroăng pêt, tí tăng dêi sâm Ngọc Linh ăm Kŏng ti veăng tơlo liăn pro drôu Sâm Ngọc Linh. Kố cho môi tơdroăng pêi pro vâ tơkâ luâ xơpá tơdroăng ki tôh hâi tro, vâ kring vế inâi sâm pơkeăng tơnêi têa Ngọc Linh.

Ing mê, Vi ƀan tơring Tu Mrông pơkâ tah lôi hlá mơ-éa ki tối pêt sâm ƀă tí tăng sâm hiăng ăm Kŏng ti veăng tơlo liăn pro Drôu Sâm Ngọc Linh a hâi lơ 30/5/2022.  Tơdroăng gá tiah kố, cho tơdroăng mơnhên hâi tro khât. Pôa Võ Trung Thạch, Kăn hnê ngăn Vi ƀan tơring Tu Mrông ăm ‘nâi, ngế Kăn phŏ hnê ngăn mê ki kĭ a hlá mơ-éa mơnhên hiăng tối tơbleăng mơnhên ƀă tro hôu khĕn hlối pôu râng tơdroăng xôi mê.

Tơdroăng Vi ƀan tơring Tu Mrông xo tơvêh, tah lôi hlá mơ-éa mơnhên ôh tá tro môi tiah ai khât  ‘na pêt sâm Ngọc Linh dêi môi khu mơdró tung kong pơlê hlối vâ ‘mâi rơnêu tơdroăng xôi ƀă xuân cho tơdroăng ki kal thế pêi pro kring vế ăm maua ngế ki rôe xúa.