VOV4.Xơ Đăng - Kong pơlê Kon Tum pêi cheăng kơtăng klêi kơ’nâi ƀai chêh dêi VOV ‘na mâu tơdroăng pro xôi tung tơdroăng hrik prêi a têa kroăng Pô Kô, ối tung pơlê Kà Nhảy, cheăm Đăk Hà. Ki tơtrŏng má môi Khu pơkuâ loăng pơlái kong kế ƀă kong prâi kong pơlê Kon Tum hiăng mơdrếo hô sơ pơkâ thế pơcháu hnoăng hnoăng hrik prêi pro tơmeăm mơjiâng hngêi trăng, troăng klông a têa kroăng Đăk Pxi, kơpong ối tung thôn 7, cheăm Đăk Pxi, tơring Đăk Hà.

Khu tê mơdró pro troăng tung dế têa kroăng Đăk Pxi vâ hrik xo prêi laga Vi ƀan cheăm Đăk Pxi ôh tá ‘nâi ôh ƀă Ƀơrô pơkuâ loăng pơlái kong kế ƀă kong prâi tơring Đăk Hà bu khĕn tối

Ki nhên tung mơ-éa pơtroh Tôh pêi cheăng kơvâ cheăng séa ngăn, mơdât tơdroăng hrik prêi tung kong pơlê Kon Tum, Khu pơkuâ loăng pơlái kong kế ƀă kong prâi. Ƀơrô Vi ƀan kong pơlê Kon Tum pơcháu Tôh pêi cheăng pơkuâ, tơrŭm ƀă Khu pơkuâ rơxế kơtâu ƀă troăng klông séa ngăn, mơnhên tơdroăng chêh dêi Khu chêh hlá tơbeăng, pơxâu phâk mâu tơdroăng pro xôi (tâng ai) tiô hnoăng ƀă pơkâ dêi luât.

A Sa Ly tơplôu ƀă tơbleăng