VOV4. Xơ Đăng - Tung péa hâi, lơ 10 ƀă 11/10 tung tơring Tu Mrông, kong pơlê Kon Tum ai kong mêi kân. Vâ hbrâ ví xía vâ drêng kong mêi têa kân lân lu ƀă tơnêi hơnâp, tơring Tu Mrông ăm hok tro pơtê hriâm vâ rak tơniăn. Vi ƀan tơring Tu Mrông pơkâ thế ƀơrô ngăn hnê hriâm ƀă hnê mơjiâng tuăn ngôa rơkê tơbleăng ăm hok tro pơtê hriâm ing hâi lơ 11/10 ƀă bú ăm hok tro vêh hriâm nếo drêng hiăng ‘nâi tơniăn.

Hok tro tơring Tu Mrông vêh hriâm nếo a hngêi trung klêi kong mêi khiá mơhot rôh má 4 plong mot

Pôa An Văn Sáu, Ngế pơkuâ ƀơrô ngăn hnê hriâm ƀă hnê mơjiâng tuăn ngôa rơkê tơring Tu Mrông ăm ‘nâi, Ƀơrô hiăng teăm tối tơbleăng troh 25 toăng  hngêi trung tung tơring ƀă 8 rơpâu 224 ngế hok tro rêm râ hriâm hiăng pơtê a hngêi vâ hbrâ ví kong mêi têa lân lu. Ngế pơkuâ hngêi trung, mâu thái cô dêi rêm hngêi trung xuân hiăng hnê tối ăm mâu vâi o hok tro pêi mâu tơdroăng tơniăn hbrâ ví xía vâ drêng kong mêi têa rơlêa, lân lu, tơnêi tơnâp tung pơla ối a hngêi, môi tiah: pôi tá lo pá gong a long, têa kroăng, têa krông, pôi tá lăm kât kuăn, rup ká, pôi tá tăng ko hdréa; ví pôi tá prôk a kông ki ai têa lu dêng kong mêi kân, mâu tíu tơnêi tơhnah tơhnâp.

VOV Tây Nguyên/Tơplôu: Gương