Hlo tơdroăng ki ai khât kố, kơvâ ngăn hnê hriâm ƀă hnê mơjiâng tuăn ngoâ rơkê kong pơlê Kon Tum dế pêi pro hên troăng hơlâ vâ rak vế tơniăn hnoăng cheăng hnê a mâu hngêi trung. Tơdroăng tơbleăng sap ing Khu ngăn hnê hriâm ƀă hnê mơjiâng tuăn ngoâ rơkê kong pơlê Kon Tum ăm hlo, ƀă râ Mầm non nôkố kong pơlê ối kal 705 ngế, râ má môi 477 ngế, râ má péa 497 ngế ƀă râ má pái ối kal 43 ngế.

Vâ ‘mâi mơnhông tơdroăng ki ôh tá ai tŭm thai cô, kơvâ ngăn hnê hriâm ƀă hnê mơjiâng tuăn ngoâ rơkê kong pơlê Kon Tum pêi pro xing xoăng, ‘mot tơrŭm mâu tíu ki hnê hriâm mầm non, phôh thong kong lâ̆p ki kŭn; Xing xoăng mâu kăn ƀô̆ rak ngăn, thái cô, mâu ngế cheăng a kong pơlê tơrêm tơring, ‘mâi mơnhông tơdroăng ki rơlối, ối kal hên a mâu cheăm tơring; xing xoăng thái cô râ má péa hnê mâu tiêt ki ê a râ má môi.

Cô Cao Thanh Diễm Quỳnh hnê nâl Ănglê a 2 to hngêi trung râ má môi a pơlê kong kơdrâm Kon Tum

Khu ngăn hnê hriâm ƀă hnê mơjiâng tuăn ngoâ rơkê kong pơlê Kon Tum xuân hiăng pâ thế Khu xiâm ngăn hnê hriâm ƀă hnê mơjiâng tuăn ngoâ rơkê ‘mot tơ’nôm ƀiê̆n chê̆ tơdroăng cheăng hnê hriâm ki ối kal.